AÇG-də hasilat 1 milyon tondan çox azalsa da, dövlətin mənfəəti 1,9 dəfə artıb

Yanvar-avqust aylarında Azərbaycan Dövlət Neft Fonduna (ARDNF) “Azəri-Çıraq-Günəşli” (AÇG) yataqlar blokundan dövlətə çatan mənfəət dəyər ifadəsində $6 milyard 629 milyon gəlir olub.

ARDNF-ın ictimaiyyət üçün açıqladığı məlumatdan məlum olur ki, cari ilin 8 ayında AÇG-dən dövlətin birbaşa əldə etdiyi qazanc ötən ilin müvafiq dövrü ilə müqayisədə 1,9 dəfə artıb.

“Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb.
Müqavilənin müddəti 2024-cü ildə başa çatmalı olsa da, 2017-ci il sentyabrın 14-də Bakıda AÇG blokunun işlənməsi yenilənən müqavilə üzrə 2050-ci ilədək uzadılıb.

Yeni müqavilə üzrə BP (Britaniya) 30,37%, SOCAR 25%, MOL (Macarıstan) 9,57%, “ExxonMobil” (Amerika) 6,79%, ONGC (Hindistan) 2,31%, “Inpex Corp.” (Yaponiya) 9,31%, “ITOCHU Oil” (Yaponiya) 3,65%, “Equinor” (Norveç) 7,27%, TPAO (Türkiyə) 5,73% pay sahibidir.

Caspian Barrel