2022-ci ilin I rübündə magistral boru kəmərlərinin fəaliyyətindən Azərbaycanın gəlirləri 879 milyon 298,9 min manat ($517,2 milyon) təşkil edib ki, bu da ötən ilin analoji dövrünün göstəricisindən 7,2% çoxdur.
Bu barədə “İnterfaks-Azərbaycan” agentliyinə hökumətdən məlumat verilib.
Magistral neft kəmərlərinin (Bakı-Tbilisi-Ceyhan daxil olmaqla) fəaliyyətindən 309 milyon 395,3 min manat gəlir ($182 milyon) əldə edilib. Ötən ilin analoji dövrünün göstəricisi ilə müqayisədə gəlirlərin həcmi 10,6% azalıb.
2022-ci ilin I rübündə magistral neft kəmərləri şəbəkəsində itkilərin həcmi 0,6 min ton (2021-ci ilin müvafiq dövründə 0,8 min ton) təşkil edib.
2022-ci ilin yanvar-mart aylarında Cənubi Qafqaz boru kəməri magistralı (Bakı-Tbilisi-Ərzurum) daxil olmaqla magistral qaz kəmərlərinin fəaliyyətindən 569 milyon 903,6 min manat məbləğində gəlir ($335,2 milyon) əldə edilib. Ötən ilin I rübü ilə müqayisədə artım 20,4% olub.
Cari ilin I rübünün yekunları üzrə magistral qaz kəmərləri şəbəkəsində itkilərin həcmi 13,1 milyon kubmetr (2021-ci ilin müvafiq dövründə 14,3 milyon kubmetr) təşkil edib. Azalma 8,4% olub.
2022-ci ilin yanvar-mart aylarında magistral neft kəmərləri ilə 8 milyon 642,5 min ton neft (azalma 3,4%), qaz kəmərləri ilə 10 milyard 769,6 milyon kubmetr qaz (artım 9,7%) nəql edilib. Bununla yanaşı, magistral neft kəmərləri ilə nəqlin ümumi həcmində təxminən 77,2% Bakı-Tbilisi-Ceyhan boru kəmərinin, magistral qaz kəmərləri ilə nəqlin ümumi həcmində 46,7% Cənubi Qafqaz boru kəmərinin payına düşüb.
2021-ci ildə magistral boru kəmərlərinin fəaliyyətindən Azərbaycanın gəlirləri 3 milyard 49,505 milyon manat (artım 31,2%) təşkil edib. Magistral neft kəmərlərinin fəaliyyətindən 1 milyard 197 milyon 649,8 min manat (artım 6,3%), magistral qaz kəmərlərinin fəaliyyətindən 1 milyard 851 milyon 856 min manat gəlir (artım 54,7%) əldə edilib.
