2022-ci ilin birinci rübündə Azəri-Çıraq-Günəş-Günəşi (AÇG) yataqlarında neft hasilatı təxminən 39 milyon barel (5,3 milyon ton) təşkil edib. Bu haqda BP-Azərbaycan (layihə operatoru) şirkətinin rüblük hesabatında deyilir.
Qeyd edək ki, 2021-ci ilin birinci rübündə AÇG blokundan 43,6 milyon barel neft (5.9 milyon ton) əldə edilmişdir. Beləliklə, 2022-ci ilin yanvar-mart aylarında bu müqavilə ərazisindən neft hasilatı 10,5% azalıb.
BP-nin məlumatına görə, AÇG blokunun işlənməsi üçün xərclərin miqdarı 2021-ci ilin 1-ci rübü ilə müqayisədə 12,6% azalaraq 529 milyon dollara qədər düşüb.
“Göstərilən məbləğdə əməliyyat xərcləri 133 milyon dollar (2021-ci ilin yanvar-mart aylarında – 142 milyon dollar), kapital xərcləri isə – 396 milyon dollar (463 milyon dollar) təşkil edib.
2022-ci ilin birinci rübündə blokda orta gündəlik neft hasilatı 434 min barel (yanvar-mart 2021-ci ildə 484 min barel) təşkil etmişdir.
Eyni zamanda hesabat dövründə “Çıraq” platformasından orta hesabla 25 min barel/gün neft (2021-ci ilin birinci rübündə 30 min b/g), “Mərkəzi Azəri” platformasından – 106 min b/g (112 min b/g), “Qərbi Azəri” platformasından – 112 min b/g (130 min b/g), “Şərqi Azəri” platformasından – 70 min b/g (79 min b/g), “Dərin sulu Günəşli” platformasından – 79 min b/g (89 min b/g), “Qərbi Çıraq” platformasından isə – 42 min b/g (44 min b/g) hasilat qeydə alınıb.
