Ceyhan terminalından 3 milyard 813 milyon barel neft yola salınıb. Bu barədə “Anadolu” agentliyi məlumat verib.
“Xəzər dənizindən hasil edilən nefti dünya bazarlarına çatdıran Bakı-Tbilisi-Ceyhan (BTC) boru xəttinin Ceyhandakı dəniz terminalından 5 mininci tanker yüklənilərək yola salınıb. “BOTAS International Ltd” şirkətinin (BIL – BTC-nin Türkiyə ərazisində operatoru) məlumatına görə, 2006-cı il iyunun 2-dən bu günədək 3 milyard 813 milyon barel xam neft tankerlərə yüklənərək dünya bazarına çıxarılıb”, – deyə məlumatda bildirilir.
Hazırda “Azəri-Çıraq-Günəşli” yataqlar blokundan hasil olunan neft və “Şahdəniz” yatağından çıxarılan kondensat, SOCAR-ın nefti, eləcə də Türkmənistan, Qazaxıstan və Rusiya nefti BTC boru kəməri ilə nəql olunur.
BTC neft kəmərinin uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindədir. Boru kəmərinin ötürmə qabiliyyəti ildə 50 milyon tondan çoxdur.
Layihənin iştirakçıları BP (30,1%); SOCAR (25%); MOL (8,9%); “Equinor” (8,71%); TPAO (6,53%); ENI (5%); “Itochu” (3,4%); ExxonMobil (2,5%); INPEX (2,5%), “TotalEnergies” (5%) və ONGC (2,36%) şirkətləridir.
