Neft Fonduna Şahdəniz qazından gələn gəlir 8,3 dəfə artıb

2021-ci ildə Azərbaycan Dövlət Neft Fondu (ARDNF) “Azəri-Çıraq-Günəşli” (AÇG) yataqlar blokundan və “Şahdəniz” yatağından hasil edilən mənfəət nefti və qazının satışından $6 milyard 853,193 milyon məbləğində gəlir əldə edib.

2021-ci ildə Neft Fondunun AÇG və Şahdəniz layihələri üzrə əldə etdiyi gəlir 2020-ci illə müqayisədə 79,6% artıb.

Bu barədə “İnterfaks-Azərbaycan” agentliyinə Neft Fondundan məlumat verilib.

“ARDNF 2021-ci ildə AÇG blokundan hasil edilən mənfəət neftinin satışından $5 milyard 968,4 milyon gəlir (artım 69,4%) əldə edib”, – deyə məlumatda bildirilir.

2021-ci ildə ARDNF “Şahdəniz” yatağından çıxarılan mənfəət qazı və kondensat satışından $884,793 milyon gəlir (artım 3 dəfə) əldə edib. Fondun kondensat satışından gəlirləri $302,817 milyon (artım 35,5%), qaz satışından gəlirləri $581,976 milyon (artım 8,3 dəfə) təşkil edib.

Fondun məlumatına görə, 2001-ci ildən 1 yanvar 2022-ci il tarixinədək AÇG blokundan hasil edilən mənfəət neftinin satışından ARDNF-ə $155 milyard 373 milyon, 2007-ci ildən 1 yanvar 2022-ci il tarixinədək “Şahdəniz” yatağından hasil edilən mənfəət qazı və kondensat satışından $4 milyard 551 milyon məbləğində vəsait daxil olub.