“Gazprom Neft” şirkəti 2025-ci ilə qədər istehsalatda insan əməyi olmadan ilk neft hasilatı layihəsini həyata keçirməyə hazırlaşır. Yəni xidmət personalı tamamilə olmadan.
Caspian Barrel “RİA Novosti” agentliyinə istinadən xəbər verir ki, bu barədə şirkətin nümayəndəsi Tümen Neft və Qaz Forumundakı çıxışı zamanı bəyan edib.
Onun sözlərinə görə, söhbət quruda seçilmiş bir yataqdan gedir və burada sözügedən texnologiyanın 2023-cü ildə tətbiq edilməsi planlaşdırılır.
Yeni texnologiyaların tətbiqi işçilərin ixtisaslarının yenidən hazırlanmasını nəzərdə tutur. Hasilat prosesinə mövcud yanaşmaların yenidən düşünülməsi insanların istehsalın idarəedilməsində “daha mürəkkəb intellektual proseslərə” cəlb olunmasına gətirib çıxaracaqdır.
Şirkətdə hesab edirlər ki, bir birindən uzaq mədənlərdə və istehsalat obyektlərində rəqəmsallaşdırma səviyyəsinin yüksəldilməsi, distansion idarəetmə mexanizmlərinin tətbiqi nəticəsində layihələrin
kapital və əməliyyat xərclərinin azalması gözlənilir. Bundan əlavə, istehsalda təhlükəsizlik məsələləri xeyli artacaq, bu da boş dayanma hallarını minimuma endirəcək.
İlkin hesablamalara görə, neft istehsalında əmək xərclərinin azalması 76 faiz gözlənilir ki, bunun da 50 faizi rəqəmsallaşdırma yolu ilə əldə ediləcək. Bundan əlavə yeni texnologiyaların tətbiqi ilə qazma və istismar prosesində əhəmiyyətli bir hissə yeni materiallar və avadanlıqların istifadəsi nəticəsində əldə ediləcəkdir.
Qeyd edək ki, bir qədər əvvəl Sankt-Peterburq Beynəlxalq Əmtəə və Xammal Birjası Rusiyanın Urals markalı neftinin ilk partiyalarını onlayn auksion yolu ilə satdığı bildirilmişdi.
