Qazaxıstanda 2020-ci ilin yanvar-avqust aylarında neft hasilatı əvvəlki ilin eyni dövrü ilə müqayisədə 2,5% azalaraq 58,3 milyon ton təşkil etmişdir. Bu barədə respublikanın energetika naziri Nurlan Noqayev çərşənbə günü hökumət iclasında məlumat verib.
“Yanvar-avqust aylarında neft və kondensat istehsalı 58,3 milyon ton təşkil edib. Əsas iri layihələrə nəzər yetirsək, “Tengiz” yatağından 18,2 milyon ton, Xəzər dənizindəki “Kaşağan” yatağından 10,4 milyon ton, ölkənin ən iri qaz-kondensat yatağı sayılan “Qaraçaqanak”dan isə 8,2 milyon ton kondensat hasil etmişdir”, deyə nazir bəyan edib.
2019-cu ilin yanvar-avqust aylarında Qazaxıstanda neft istehsalı 59,8 milyon ton təşkil edib. Ötən ilin müvafiq dövrü ilə müqayisədə 2020-ci ilin 8 ayında Qazaxıstanda neft və kondensat hasilatı 1,5 milyon ton azalıb.
