2020-ci ilin yanvar-iyul aylarında Bakı-Tbilisi-Ceyhan (BTC) boru kəməri ilə 16 milyon 745,3 min ton neft nəql edilib ki, bu da 2019-cu ilin analoji dövrünün göstəricisindən 1,1% azdır. Bu barədə “İnterfaks-Azərbaycan” agentliyinə Dövlət Statistika Komitəsindən məlumat verilib.
“2020-ci ilin yanvar-iyul aylarında BTC ilə 16 milyon 745,3 min ton neft nəql olunub ki, bu da hesabat dövrü ərzində Azərbaycanın magistral neft kəmərləri ilə nəql olunan neftin ümumi həcminin 79,8%-ni təşkil edir”, – Komitədən bildirilir.
Bu dövrdə BTC ilə tranzit neftinin nəqli 2 milyon 418,8 min ton təşkil edib ki, bu da ötən ilin yanvar-aprel aylarının göstəricisi ilə müqayisədə 11,3% azdır.
2019-cu ildə BTC ilə 31 milyon 135,1 min ton neft, o cümlədən 4 milyon 475 min ton tranzit nefti nəql olunub.
Hazırda “Azəri-Çıraq-Günəşli” yataqlar blokundan hasil olunan neft və “Şahdəniz” yatağından çıxarılan kondensat, SOCAR-ın nefti, eləcə də Türkmənistan, Qazaxıstan və Rusiya nefti BTC boru kəməri ilə nəql olunur.
BTC neft kəmərinin uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindədir. Boru kəmərinin ötürmə qabiliyyəti ildə 50 milyon tondan çoxdur.
Layihənin iştirakçıları BP (30,1%); SOCAR (25%); “Chevron” (8,9%); “Statoil” (8,71%); TPAO (6,53%); ENI (5%); “Itochu” (3,4%); “ExxonMobil” (2,5%); INPEX (2,5%), “Total” (5%) və ONGC (2,36%) şirkətləridir.
