Cari ildə qlobal neft tələbatı əvvəlki illə müqayisədə 8 faiz azalacaq.
AZƏRTAC xəbər verir ki, bu proqnozla ABŞ-ın qabaqcıl investisiya banklarından olan “Goldman Sachs” çıxış edib.
“Goldman Sachs”a görə, gələn il isə neft tələbatında 6 faiz artım olacaq.
“İyunda qlobal neft tələbatı keçən ilin eyni dövrü ilə müqayisədə 12 faiz aşağı düşüb. Çin və Hindistan kimi böyük iqtisadiyyatlardakı canlanma isə neftə olan tələbatı artırıb. Dünya ölkələri karantin tədbirlərini yumşaldıqca benzin və digər yanacaqlara tələbat çoxalacaq. Aviasiya yanacağı istehlakı isə hava nəqliyyatından istehlakçı etimadından asılıdır. COVID-19-un “ikinci dalğası” qlobal neft tələbatına və istehlakına mənfi təsir göstərə bilər”, – deyə bank bildirib.
