Qlobal neft tələbatı koronavirusdan əvvəlki səviyyələrə 2021-ci ilin ortalarında yüksələ bilər.
AZƏRTAC xarici KİV-lərə istinadla xəbər verir ki, bu sözləri Beynəlxalq Enerji Agentliyinin (IEA) icraçı direktoru Fatih Birol deyib.
O qeyd edib: “Neft tələbatı gələn ilin ortalarında COVID-19-dan əvvəlki səviyyələrə yüksələ bilər. Hazırda əsas məsələ hava yolu ilə sərnişindaşımanın nə vaxt başlayacağı və iqtisadiyyatın hansı müddətdə bərpa olunacağıdır. Bu, görüləcək tədbirlərdən və pandemiya böhranına qarşı həll yollarından asılı olacaq. COVID-19-dan əvvəlki dövrdə qlobal neft tələbatı gündəlik 100 milyon barrel səviyyəsində idi. Koronavirus qlobal neft tələbatına ciddi təsir göştərib.
F.Birol bildirib ki, əgər qlobal iqtisadiyyat tez bərpa olunarsa və virusun “ikinci dalğası” yaşanmazsa, neftə tələbatın yaxın aylarda əvvəlki səviyyəyə qayıdacağının şahidi ola bilərik. Lakin hökumətlər enerji sektorundakı problemləri həll etmək üçün təsirli siyasət hazırlamalıdır. Videokonfrans təşkil etmək və ya evdən işləmək enerji sektorundakı problemlər və iqlim dəyişikliyi böhranı üçün həll yolu deyil.
