2020-ci ildə Azərbaycanın qeyri-neft sektorunda ÜDM 2% azalacaq, 2021-ci ildə isə artım 1% təşkil edəcək. Bu barədə Beynəlxalq Valyuta Fondunun (BVF) proqnozlarında deyilir.
Daha əvvəl BVF 2020-ci ildə Azərbaycanda ÜDM-nin 2,2% azalacağını, 2021-ci ildə isə iqtisadi artımın 0,7% təşkil edəcəyini proqnozlaşdırmışdı. Bu proqnozlar COVID-19 pandemiyasının və neftin ucuzlaşmasının ölkə iqtisadiyyatına mənfi təsiri nəzərə alınmaqla verilib.
Bununla belə, cari ildə ÜDM-nin nominal həcmi $40 milyard, 2021-ci ildə $42 milyard təşkil edəcək. Fondun Qafqaz və Mərkəzi Asiya regionu üzrə aprel icmalında dərc olunmuş proqnozlara əsasən, 2020-ci ildə Azərbaycanın neft sektounda 2,5% azalma, 2021-ci ildə 0,2% artım olacaq.
BVF-nin qiymətləndirmələrinə görə, 2020-ci ildə ölkədə gündəlik neft hasilatı 0,67 milyon barrel (2019-cu ildə – 0,71 milyon barrel), 2021-ci ildə 0,65 milyon barrel həcmində olacaq.
2020-ci ildə Azərbaycanda inflyasiya 3,3%, 2021-ci ildə 3,2% təşkil edəcək.
2020-ci ildə Azərbaycandan $14,4 milyard (2019-cu ildə $23,6 milyard), 2021-ci ildə $15,2 milyard dəyərində mal və xidmət ixrac olunacaq, 2020-2021-ci illərdə isə ölkəyə idxal müvafiq olaraq $15,2 milyard və $14,4 milyard təşkil edəcək.
Azərbaycan hökuməti 2020-ci ildə ÜDM artımını 3%, 2021-ci ildə 3,7% səviyyəsində proqnozlaşdırır. Bu dövrdə qeyri-neft sektorunda ÜDM 3,8% və 3,4%, neft sektorunda ÜDM 0,9% və 4,5% artacaq. Bununla belə, hökumət koronavirus pandemiyası və neftin ucuzlaşması nəzərə alınmaqla yenilənmiş proqnozları hələ dərc etməyib.
2019-cu ildə Azərbaycanda ÜDM 2,2%, qeyri-neft sektorunda 3,5%, neft sektorunda 0,4% artıb.
