SOCAR-ın birinci vitse-prezidenti, akademik Xoşbəxt Yusifzadənin sədrliyi ilə “Azərbaycan Milli Neft Komitəsi” İctimai Birliyinin növbəti iclası keçirilib.
Caspian Barrel-ə Komitədən verilən məlumata görə, iclasda İctimai Birliyin yeni sədri, İdarə heyətinin 19 nəfərdən ibarət tərkibi seçilib.
“Azərbaycan Milli Neft Komitəsi”nin yeni sədri Azərbaycan Respublikasının Energetika naziri Pərviz Şahbazov seçilib.
Xatırladaq ki, “Azərbaycan Milli Neft Komitəsi” 2005-ci ildə təsis edilmiş və həmin il Yohanezburqda keçirilən Konqresdə Dünya Neft Şurasına (WPC) üzv seçilmişdir.
Hər üç ildən bir keçirilən Dünya Neft Konqresinin əsas təşkilatçısı 1933-cü ildə yaradılmış Dünya Neft Şurasıdır. Konqres neft və qaz sənayesi üzrə mühüm məsələlərin müzakirə olunduğu və vacib qərarların qəbul edildiyi beynəlxalq platformadır. Bitərəf və qeyri-siyasi qurum olan Dünya Neft Şurası bu sahədə elmi yeniliklərin tətbiqi, texnologiya və informasiya mübadiləsi, dünyanın neft ehtiyatlarından davamlı və hamının rifahına xidmət edəcək şəkildə istifadə olunması istiqamətlərində fəaliyyət göstərir. Altmış beş üzv ölkəni birləşdirən Dünya Neft Şurası dünyada neft-qaz istehsalçıları və istehlakçılarının 96 faizini əhatə edir.
Hazırda Dünya Neft Şurasının İcraiyyə Komitəsinin prezidenti Norveçli Tor Fjaerandır.
