Yanvarın 27-də SOCAR-ın prezidenti Rövnəq Abdullayev Türkiyə Cumhuriyyətinin enerji və təbii qaynaqlar naziri Berat Albayrakla görüş keçirib.
SOCAR-ın mətbuat xidmətinin məlumatına görə, görüşdə Türkiyənin enerji sektorunda şirkətin həyata keçirdiyi layihələrin əhəmiyyəti qeyd olunub, planlaşdırılan işlərin qrafikə uyğun icra edildiyi bildirilib.
Tərəflər TANAP-ın inşası işlərinin, eyni zamanda Petkim yarımadasında həyata keçirilən layihələrin vaxtında və yüksək keyfiyyətlə başa çatdırılacağına əminliklərini vurğulayıblar. Həmçinin qarşılıqlı maraq doğuran sahələr üzrə əməkdaşlığın genişləndirilməsi imkanları dəyərləndirilib, bu istiqamətdə ətraflı fikir mübadiləsi aparılıb.
R.Abdullayev Türkiyəyə səfəri çərçivəsində TANAP konsorsiumunun İdarə Heyətinin iclasında da iştirak edib. İclasda layihə üzrə 2015-ci ildə həyata keçirilmiş işlərin yekunu və cari ildə qarşıda duran vəzifələr müzakirə olunub.
İclasda 2016-cı ildə layihə çərçivəsində görüləcək işlər haqqında fikir mübadiləsi aparılıb, zəruri sənədlər təsdiqlənib.
