“SOCAR-Polymer” MMC-nin yüksək sıxlıqlı polietilen və polipropilen zavodlarının 2018-ci ildə işə salınması planlaşdırılır. Bu barədə şirkətin baş direktoru Fərid Cəfərov bu gün “MDB ölkələrinin neft emalı və neft-kimya həftəsi” 19-cu illik konfransında çıxışı zamanı bildirib.
“Zavodların tikintisi üzrə layihənin dəyəri $750 mln. təşkil edir, bunun 40%-i səhmdarların kapitalı, 60%-i kredit vəsaitləridir. Zavodlarda istehsal ediləcək məhsulun bir hissəsi daxili bazara yönəldiləcək, qalanı Türkiyə, Avropa və MDB ölkələrinə ixrac ediləcək. Bizim üçün əsas hədəf Türkiyə bazarıdır, SOCAR bu ölkədə plastik məmulatlar bazarının 30%-nə nəzarət edir.
F.Cəfərov qeyd edib ki, “SOCAR Polymer” bu layihələrin həyata keçirilməsi üçün Rusiyanın “Qazprombank”ından kredit cəlb edib. “İlk tranş artıq alınıb. Bu kreditdən təxminən $60 mln. sərf olunub. “Biz “Qazprombank”la əməkdaşlıqdan məmnunuq və hazırda bankın bir sıra başqa layihələri maliyyələşdirmək imkanlarını müzakirə edirik”,- deyə o qeyd edib.
O, jurnalistlərlə söhbət zamanı bildirib ki, polipropilen zavodunda işə salma-sazlama işləri 2017-ci ilin ikinci yarısında başlayacaq, podratçı 2018-ci ilin yanvar ayında zavodu sənaye istismarına verməyi planlaşdırır.
“Cari ilin sonuna qədər “SOCAR-Polymer” MMC-nin yüksək sıxlıqlı polietilen zavodunun tikintisi haqqında müqavilə (Engineering, procurement and construction, EPC) imzalanacaq. Zavodda işə salma-sazlama işlərinin 2017-ci ilin sonu, 2018-ci ilin əvvəlində başlanması planlaşdırılır. Zavod 2018-ci ilin ikinci rübünün sonunda istismara veriləcək”, – deyə F.Cəfərov qeyd edib.
O bildirib ki, Londonda bu layihə çərçivəsində risklərin təkrar sığortasının təqdimatı keçirilib.
“Təqdimat mərasimində 15 təkrarsığorta şirkəti iştirak edib. Ümumilikdə layihə böyük maraq doğurub və biz gələn ilin sonuna qədər onlardan cəlbedici təkliflər gözləyirik”, – deyə F.Cəfərov qeyd edib.
Polipropilen zavodunun maksimal gücü ildə 180 min ton, polietilen zavodunun maksimal gücü ildə 120 min ton məhsul istehsal etməyə imkan verəcək.
* SOCAR 2015-ci ilin iyun ayında Rusiyanın “Qazprombank” ASC-dən “SOCAR-Polymer” MMC-nin yüksək sıxlıqlı polietilen və polipropilen zavodlarnın tikintisinin maliyyələşdirilməsi üçün $489 mln. manat məbləğində kredit cəlb edib. Kredit vəsaitləri 10 il müddətinə ayrılıb.
“SOCAR-Polimer” SOCAR tərəfindən təsis edilib. Nizamnamə kapitalı $100 mln. təşkil edir. 2013-cü ilin sonlarından müəssisənin səhmlərinin 51%-i SOCAR-a, 49%-i “PAŞA Holdinq”, “Gilan Holding” və “Azersun Holding”ə məxsusdur.
