“BP-Azerbaijan” şirkətində bu gün yeni təyinatla bağlı qərar qəbul edilib. “BP-Azərbaycan” şirkətinin “Azəri” yatağı üzrə əməliyyatlarının rəhbəri Elxan Məmmədov şirkətin neft və qaz hasilatı üzrə vitse-prezidenti vəzifəsinə təyin edilib.
Caspian Barrel-in əldə etdiyi məlumatlara görə, Elxan Məmmədov vəzifəsinin icrasına 2016-cı il yanvarın 1-dən başlayacaq.
Bu yeni təyanatla “BP Azerbaijan” şirkətində texniki sahəyə məsul olan ilk yerli kadrın yüksək vəzifəyə təyin olunması baş verir.
Qeyd edək ki, bu vəzifədə Məmmədov BP-nin Azərbaycan, Gürcüstan və Türkiyə regionu üzrə hasilat işlərinin idarə olunmasına cavabdeh olacaq. Bundan əlavə, o həm də Azəri-Çıraq-Günəşli (AÇG) üzrə Texniki Qrupa sədrlik edəcək.
Vitse prezident rolunda Məmmədov yeni vəzifəyə gedəcək Pat Droonu əvəz edəcək və BP-nin regioal rəhbər qrupunun üzvü olacaq, bu da BP-nin kadrların milliləşdirilməsi planına uyğundur.
Məmmədov BP-yə 2001-ci ildə Çıraq platformasında nəzarət-ölçü cihazları üzrə texnik kimi qoşulub. Sonra o, BP-nin Şimal dənizində və Xəzərdəki müxtəlif platformalarında çalışıb. Daha sonra o, Çıraq platformasının meneceri və 2009-cu ildə isə BP-nin Azərbaycan üzrə quru əməliyyatları meneceri təyin olunub. 2013-cü ilin iyun ayından BP-nin Azəri sahəsi üzrə əməliyyatlar meneceridir.
Məmmədov 2011-ci ildə ABŞ-ın Boston şəhərindəki Massaçusets Texnologiya İnsitutunun Əməliyyatlar Akademiyasını bitirib. O, Əməliyyatlar üzrə ən yüksək Pol Martins mükafatına layiq görülüb, BP-nin Azərbaycan, Gürcüstan və Türkiyə regionu üzrə əməliyyatlar sahəsində ixtisas forumunun sədri və regionun texniki forumunun həm-sədridir.
2014-cü ildə Məmmədov Azərbaycan Respublikasının Prezidenti tərəfindən ölkənin neft və qaz sənayesinin inkişafına töhfəsinə görə “Tərəqqi” medalına layiq görülmüşdür. Ailəlidir, üç övladı var.
* Hazırda “BP-Azerbaijan” şirkətində insan resursları üzrə vitse-prezident postunu Leyla Novruzova, ictimaiyyət və dövlət orqanları ilə əlaqələr, korporativ sosial məsuliyyət proqramları, daxili audit və strategiya məsələləri üzrə vitse prezident isə Bəxtiyar Aslanbəylidir. Sonuncu vəzifəsinin icrasına bu il avqustun sonundan başlayıb.
