Dekabrın 4-də Azərbaycan Dövlət Neft Şirkətinin “Günəşli” yatağındakı 10 saylı dərin dəniz özülündə baş vermiş qəzada itkin düşənlərin axtarışı istiqamətində aparılan bütün cəhdlərə baxmayaraq nəticə əldə olunmayıb.
“Report” xəbər verir ki, bu barədə “Azneft” İstehsalat Birliyinin baş mühəndisi Balamirzə Əlirəhimov bildrib.
Onun sözlərinə görə, FHN və Xəzər Dəniz Gəmiçilik Idarəsinin vertolyotları axtarışları davam etdirirlər. “Yanğının söndürülmısi ilə əlaqədar əlavə qüvvələr cəlb olunub. “Şıxlınski” gəmisi gətirilib, onun üzərinə əlavə texnikalar qoyulub. Fontana qarşı mübarizə qüvvələri və idarənin mütəxəssisləri özlülün üzərinə çıxa biliblər.
O, qeyd edib ki, mütəxəssislər vəziyyəti analiz ediblər. “Texnika ilə təmin olunması üçün iş planı hazırlanıb. Digər yaxın özüllərdən həmin özülə yüksək təzyiqli su verilməsi hazırda davam edir.
B.Əlirəhimov bildirib ki ki, bu gecə yanğının aradan qaldırılması qarşıya qoyulub. Bu iş sabahadək sona çatdırılacaq.
Bununla belə Caspian Barrel-in sualını cavablandırarkən SOCAR-ın birinci prezidenti Xoşbəxt Yusifzadə bildirib ki, yanğının söndürülməsi neft quyularındakı təzyiqin aşağı düşmə tempindən daha çox asılıdır. “Platformada hazırda neft quyuları yanır, qaz xəttindəki qalıq yanacaq yanıb tükənib. Neft quyularına qaz vurulmadıqda onların təzyiqi tədricən azalır və quyu ağzına çıxma azalır. Bu isə imkan verir ki, platformada yanğını daha tez müddətdə söndürmək mümkün olsun”, deyə SOCAR rəsmisi bildirib.
Qeyd edək ki, həmin platforma 1984-cü ildə istifadəyə verilib və texniki imkanları suda 50 il müddətinə istismarda qalmağa imkan verir. İndiyə qədər platformadan 28 quyu qazılıb. Ancaq ondan 24-ü istismarda olub. Qəza baş verən ana 950 ton gündəlik neft və 1 mln kub metr qaz hasilatı varmış. Müqayisə üçün bildirək ki, 28 May Neft və Qaz Çıxartma İdarəsi (dayazsulu Günəşli yatağını istismar edir) gündəlik olaraq 13,2 min ton neft və 14 milyon kub metrdən çox qaz hasil edir.
