2015-ci ilin yanvar-oktyabr ayları ərzində Azərbaycan Dövlət Neft Fondunun (ARDNF) “Azəri-Çıraq-Günəşli” (AÇG) yataqlar blokundan hasil edilən mənfəət neftinin və “Şahdəniz” yatağından hasil edilən mənfəət qazının satışından $6 mlrd. 135 mln. gəlir əldə edib. Bu barədə “İnterfaks-Azərbaycan” agentliyinə fonddan məlumat verilib.
ARDNF-in məlumatına əsasən, bu məbləğin $5 mlrd. 856 mln.-nu “Azəri-Çıraq Günəşli” (AÇG) blokundan hasil edilmiş mənfəət neftinin, $279 mln.-u “Şahdəniz” yatağından hasil edilmiş mənfəət qazının satışından daxilolmalar təşkil edib.
“Ümumilikdə 2001-ci ildən 2015-ci il noyabrın 1-nə qədər ARDNF-ə AÇG blokundan hasil edilmiş Azərbaycanın mənfəət neftinin satışından $116 mlrd. 7 mln., “Şahdəniz” yatağından hasil edilmiş mənfəət qazının satışından (2007-ci ildən – İF-Az) $2 mlrd. 399 mln. vəsait daxil olub”, – deyə fonddan qeyd ediblər.
Caspian Barrel xatırladadır ki, 2014-cü ildə Neft Fonduna AÇG blokunda daxilolmaların həcmi 15 milyard 118 milyon dollar təşkil etmişdi. Cari ilin 10 ayının göstəricilərinə görə, ötən ilki daxilolmalarının cəmi 38,7%-i qədər yığım əldə edilib.
Xəbər verildiyi kimi, “Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb və elə həmin il dekabrın 12-də qüvvəyə minib. Layihənin iştirakçıları Britaniyanın bp (35,78%), Amerikanın “Chevron” (11,27%), “ExxonMobil” (8,0006%), Hindistanın “ONGC Videsh Limited” (2,72%), Yaponiyanın “Inpex” (10,96%), “Itochu” (4,3%), Azərbaycanın SOCAR (11,65%), Norveçin “Statoil” (8,56%), Türkiyənin TPAO (6,75%) şirkətləridir.
Xəbər verildiyi kimi, “Şahdəniz” yatağının işlənməsi haqqında müqavilə 1996-cı il iyunun 4-də Bakıda imzalanıb və elə həmin il oktyabrın 17-də Milli Məclisdə ratifikasiya edilib. “Şahdəniz” layihəsinin iştirakçıları BP (operator – 28,8%), “Statoil” (15,5%), SOCAR (16,7%), “Petronas” (15,5),“LUKoil” (10%), NICO (10%) və TPAO (9%) şirkətləridir.
1999-cu ildə yaradılmış ARDNF-də neft müqavilələrinin reallaşmasından, əsasən dövlətin mənfəət neftinin satışından, ölkə ərazisində neft və qaz nəqlinə görə tranzit tariflərindən, dövlət əmlakının icarəsindən və digər mənbələrdən daxil olan gəlirlər toplanır.
