Hazırda “BP-Azerbaijan” şirkətində 2 900 nəfərə yaxın Azərbaycan vətəndaşı çalışır. Bunu jurnalistlərə BP şirkətinin Azərbaycan, Türkiyə və Gürcüstan üzrə regional direktoru Qordon Birrell bildirib.
Onun sözlərinə görə, bu, şirkətin işçilərinin ümumi sayının 87%-i deməkdir. Birrell qeyd edib ki, onların bir çoxu peşəkar kadrlardır və yüksək vəzifələr tuturlar. O, əlavə edib ki, “Şahdəniz-2” layihəsi çərçivəsində 15 mindən çox yerli azərbaycanlılar üçün iş yerləri təmin edilib.
Ancaq “BP-Azerbaijan” şirkətində 87% Azərbaycan vətəndaşının daimi iş yeri ilə təmin olunması yaxşı göstəricidirmi?
Bu suala Caspian Barrel Neft Araşdırmaları Mərkəzinin rəhbəri İlham Şaban belə cavab verir: “Bu, o deməkdir ki, c-b Birrelin rəhbərlik etdiyi şirkətdə hazırda 377 əcnəbi mütəxəssis çalışır. 2010-cu ilin yekunlarına həsr edilmiş audit edilmiş hesabtda da qeyd olunurdu ki, “BP-Azerbaijan” şirkətində işləyən Azərbaycan vətəndaşlarının faiz göstəricisi 87-dir. Ancaq 10 il əvvəl bu göstərici 74% olmuşdu”.