Sentyabrın 3-də SOCAR-ın prezidenti Rövnəq Abdullayev şirkətin baş ofisində Malayziyanın “Petronas” neft-qaz şirkətinin prezidenti və baş icraçı direktoru Datuk van Zulkiflee van Ariffinin başçılıq etdiyi nümayəndə heyətini qəbul etmişdir. Bu haqda SOCAR mətbuat xidməti məlumat yayıb.
Səmimi qəbul üçün təşəkkürünü bildirən qonaq Azərbaycana məmnunluq hissi ilə səfər etdiklərini, ölkəmizdə investisiya üçün əlverişli mühit olduğunu qeyd etmiş, SOCAR-la əməkdaşlığın rəhbərlik etdiyi şirkət üçün mühüm əhəmiyyət daşıdığını vurğulamışdır. Görüşdə “Şahdəniz” layihəsində “Statoil”un payının “Petronas” tərəfindən alındığı xatırlanmışdır.
Rövnəq Abdullayev qonaqlara “Şahdəniz” və Cənub Qaz Dəhlizi layihələrinin gedişi haqqında ətraflı məlumat vermişdir. Bildirilmişdir ki, “Şahdəniz” yatağının işlənilməsinin ikinci mərhələsi və boru kəmərlərinin inşası layihələri üzrə işlər qrafikə uyğun şəkildə uğurla davam etdirilir. Görülən işlər əminlik yaradır ki, 2018-ci ildə ilk qaz həcmlərinin Türkiyəyə ötürülməsi mümkün olacaq.
Datuk van Zulkiflee van Ariffin “Petronas” nümayəndə heyətinin üzvlərini SOCAR rəhbərliyinə təqdim etmiş, iki şirkət arasında əlaqələrin daha da genişləndirilməsində maraqlı olduqlarını bildirmişdir. SOCAR prezidenti isə öz növbəsində Azərbaycanın neft-qaz sənayesində əməkdaşlıq üçün geniş imkanların mövcud olduğunu vurğulamış, ölkəmizdə investisiyaların təhlükəsizliyinə tam təminat verildiyini qonaqların diqqətinə çatdırmışdır.
Görüşün sonunda SOCAR və “Petronas” arasında “Qarşılıqlı anlaşma haqqında Memoranduma əlavə” imzalanmışdır. Sənədi SOCAR-ın prezidenti Rövnəq Abdullayev və “Petronas” şirkətinin prezidenti və baş icraçı direktoru Datuk van Zulkiflee van Ariffin imzalamışlar.
