BBC radiosu France Presse agengliyinə istinadən xəbər verir ki, Maros Sevcoviç həmçinin türkmən qazının Xəzərin dibi ilə nəql olunmasının 2019-cu ildən başlana biləcəyini bildirib.
Cənab Sefcovic aydınlıq gətirib ki, hər iki variant – yəni türkmən qazının Transxəzər kəməri və İran ərazisi ilə nəqli variantları müzakirə edilib. O əlavə edib ki, İranla Qərb arasında diplomatik münasibətlər hazırda müsbət axarda inkişaf edir.
Maros Sefcovic deyib ki, Avropa İttifaqı İranla dünyanın 6 gücü arasında davam edən nüvə danışıqlarının hərtərəfli sazişin imzalanması ilə başa çatacağına ümid bəsləyir.
İran rəsmiləri bundan əvvəl həmişə bildirirdilər ki, qazın Xəzərin dibi ilə nəqli iqtisadi baxımdan sərfəli deyil və ən yaxşı marşrut türkmən qazının İran ərazisi ilə nəqli ola bilər.
Azərbaycan kənarda qala bilər
Xəbər verilir ki, dənizin dibi ilə kəmərin çəkilişi 5 milyard dollara başa gələ bilər, lakin dənizin bölüşdürülməsi məsələsinin özü hələlik mübahisəli olaraq qalır.
Türkmənistan qazının birbaşa İran ərazisi ilə nəqli Azərbaycanı bu layihədən kənarda qoyardı.
Digər tərəfdən qazın Transxəzər kəməri ilə nəqli variantı dənizin statusu məsələsinə görə Tehranın mövqeyindən asılı olacaq. Belə bir şəraitdə İranın Tansxəzər layihəsində maraqlı olmayacağı bəllidir.
Transxəzər layihəsinə Rusiyanın da mənfi münasibət bəslədiyi bəllidir. Moskva dənizin dibi ilə kəmər çəkilişinin və qazın nəqlinin ekoloji baxımdan riskli olduğunu bildirir.
Layihəyə görə Transxəzər kəməri ildə 30 milyard kumbmetr qazı Avropa İttifaqına nəql etməlidir.
Dünyanın 4-cü qaz ölkəsi
Ekspertlər bildirirlər ki, türkmən qazının İran vasitəsilə nəqlinə dair ortalıqda hələlik heç bir layihə yoxdur, lakin Avropa İttifaqının iqlim və energetika komissarı Miguel Arias bildirib ki, İrana Rusiyadan yan keçən “cənub dəhlizlərindən” biri kimi baxılır, France Presse yazır.
İranla ortaq sərhədə malik Türkmənistan qaz ehtiyatlarına görə dünyanın 4-cü ölkəsidir.
Türkmənistan hazırda Çinə lazım olan qazın tən yarısını təchiz edir. Rusiyanı çıxmaq şərtilə Türkmənistanın öz qazını Avropaya çatdırması üçün infrastrukturu yoxdur.
