SOCAR (Azərbaycan Dövlət Neft Şirkəti) Batumidə SOCAR-ın Gürcüstandakı nümayəndəliyinin yeni inzibati binasını istifadəyə verib. Bu barədə SOCAR-ın rəsmi saytında məlumat verilir.
Batumi portu yaxınlığında tikilmiş yeni binada “SOCAR Energy Georgia” şirkətinin və onun strukturlarının ofisləri yerləşəcək. 150 əməkdaşın çalışacağı dördmərtəbəli binanın tikintisinə 2012-ci ildə başlanılıb. Burada iş otaqları, texniki otaqlar, 24 nəfərlik yeməkxana və mətbəx, habelə inzibati otaqlar və konfrans zalı yerləşir.
Bina memar Rauf Xıdırov tərəfindən layihələndirilib. 1598 kvadratmetrlik torpaq sahəsində inşa edilmiş binanın və yardımçı tikililərin ümumi sahəsi 3383,51 kvadratmetrdir. Binanın fasadı klassik, əsas elementləri isə neoklassik üslubda işlənib.
Binaya mədəni irs statusu verilib.
