Azərbaycan Dövlət Neft Şirkətinin Prezidentinin sərəncamı ilə Lidya Salahova AGSC (Azerbaijan Gas Supply Company) rəhbəri təyin edilib.
SOCAR 2015-ci ilin 1 mayından AGSC şirkətində operator, South Caucasus Pipeline Company şirkətində isə kommersiya operatoru olub. Bu, Norveçin Statoil şirkətinin hüquqi olaraq həmin layihələrədən çıxmasından sonar baş verib.
Caspian Barrel-in məlumatına görə, Lidya Salahova son illərdə AGSC şirkətində baş menecerin müavini işləyib. Bundan əvvəl isə o, 5 il SOCAR-ın qaz ixracı idarəsində marketinq-menecer vəzifəsində çalışıb.
2007-2009-cu illərdə L.Salahova “Silk Way Technics” şirkətində əməliyyatlar üzrə menecer işləyib. Buna kimi isə, 1998-ci ildən SOCAR-ın Marketinq və İqtisadi Əməliyyatlar İdarəsinin baş mütəxəssisi vəzifəsində çalışıb.
L.Salahova Azərbaycan Dövlət İqtisad Universitetində (1994-1998) bakalavr dərəcəsi, 2006-2008 –ci illərdə isə Azərbaycan Dövlət Neft Akademiyasında (Corciya Universiteti ilə birgə təhsil proqramı – ABŞ) magistr dərəcəsi alıb.
