SOCAR Rumıniyada yanacaqdoldurma məntəqələri şəbəkəsini genişləndirməkdə davam edir.
Yanvarın 30-da Sibiu şəhərində istifadəyə verilmiş yanacaqdoldurma məntəqəsi sayca Rumıniyada “SOCAR” brendi altında fəaliyyət göstərən 32-ci YDM-dir.
Açılış mərasimində SOCAR-ın Rumıniya nümayəndəliyi və “SOCAR Petroleum SA” şirkətinin əməkdaşları, Sibiu şəhəri icra hakimiyyəti və yerli dövlət qurumlarının nümayəndələri, KİV təmsilçiləri iştirak etmişlər.
Geniş torpaq sahəsinə malik YDM-də Benzin-95, Dizel Euro-5 və Super Dizel tipli yanacaq məhsullarının satışı həyata keçirilir. Məntəqədə quraşdırılmış 3 sayğac 4 kiçik və 2 böyük avtonəqliyyat vasitəsinin eyni zamanda yanacaqla təmin edilməsinə şərait yaradır.
Digər YDM-lərdə olduğu kimi, burada da müştərilərə “Nar” kafedə ənənəvi Azərbaycan məhsulları, 24 saat pulsuz internet xidməti təqdim olunur. Qeyd edək ki, SOCAR Rumıniyanın artıq 15 regionunda – Botoşan, Suçeava, Nyamts, İaşi, Bihor, Buzau, Bakau, Vrancea, Timiş, İlfov, Kluj, Valcea, Arad, Bistritsa-Nasaud və Sibiuda yanacaqdoldurma məntəqələrinə malikdir.
