Baxmayaraq ki, neftin qiyməti dünya birjalarında artıq bir aya yaxındır ki, 85 dollar ətrafında dövr edir və dünyanın aparıcı enerji mərkəzləri yaxın illər üçün neftin qiymətinin əvvəlki səviyyədə (1 barel üçün 110 dollar) bərpa olunmayacağına dair proqnozlar verirlər, Azərbaycanın paytaxtında kapitalyönümlü layihələrin həyata keçirilməsində heç bir təxirəsalınmadan əsər-əlamətin izləri görünmür.
AzərTAc-a Səbayel Rayon İcra Hakimiyyətindən verilən məlumata görə, Bakı bulvarının qərb hissəsində, parkın yeni hissəsi ilə köhnə hissəsinin birləşdiyi yerdə (Əl Oyunları sarayı ilə üzbəüz) möhtəşəm istirahət-əyləncə-alış-veriş mərkəzi inşa olunur. İlkin olaraq “Caspian Waterfront” layihəsi adlandırılan tikili 3,5 hektar ərazini əhatə edir.
Tikili “Sydney Opera House” həndəsi formalı olmaqla, Azərbaycanın milli emblemi olan səkkizguşəli ulduz içində alov görüntüsündədir.
120,000 m² ümumi sahəsi olan tikili 9 mərtəbəli olacaq. İkimərtəbəli zirzəmi avtodayanacaq kimi nəzərdə tutulub. Üst hissə isə 7 mərtəbədən ibarət olacaq ki, mərkəzdəki alova bənzəyən tikilinin hündürlüyü 70 metrə çatacaq.
Hazırda ərazidə tikinti-quraşdırma işləri davam etdirilir. Layihənin 2016-cı ildə təhvil verilməsi gözlənilir.
