Azərbaycan 2015-ci ildə Cənub qaz dəhlizinin reallaşdırılmasına 2 mlrd. 269 mln. manat (cari kursla $2,9) məbləğində vəsait yönəltməyi planlaşdırır.
Bu gələn il üçün ümumi büdcə xərclərinin 8,8%-ni təşkil edəcək. Bu barədə maliyyə naziri Samir Şərifov çərşənbə axşamı parlamentdə “Azərbaycanın 2015-ci il dövlət büdcəsi haqqında” qanun layihəsinin təqdim edərkən bildirib.
“Bu məqsədlər üçün dövlət büdcəsindən 928 mln. manat, Dövlət Neft Fondunun (ARDNF) büdcəsindən 1 mlrd. 341 mln. manat yönəldiləcək”, – deyə S.Şərifov qeyd edib.
Cənub qaz dəhlizinin reallaşdırılması üçün eyniadlı səhmdar cəmiyyət yaradılıb. Gələn ilin dövlət büdcəsində nəzərdə tutulan vəsaitin “Şahdəniz” yatağının işlənməsi, Cənubi Qafqaz Boru Kəmərinin (CQBK) genişləndirilməsi, Trans-Anadolu qaz kəməri (TANAP) və Trans-Adriatik qaz kəməri (TAP) layihələrinin reallaşdırılmasına yönəldilməsi planlaşdırılır.
Şahdəniz-2 layihəsinin dəyəri $28 milyarddır. Cənubi Qafqaz Boru Kəmərinin genişləndirilməsi layihəsi “Şahdəniz” yatağının işlənməsi üzrə “Mərhələ-2” çərçivəsində Türkiyə və Avropaya ildə 16 mlrd. kubmetr qazın nəqlinin təmin edilməsi üçün boru kəmərinin ötürmə qabiliyyətinin indiki 8 milyard kub metrdən 25 milyard kub metrə qədə genişləndirilməsini nəzərdə tutur.
TANAP qaz kəməri Azərbaycan qazının Gürcüstan-Türkiyə sərhədindən Türkiyənin qərb sərhədlərinə qədər nəqli üçün nəzərdə tutulub. Qaz kəmərinin ötürmə qabiliyyəti ən azı 16 mlrd. kubmetr təşkil edəcəyi ehtimal olunur. Bu həcmin 10 mlrd. kubmetri Avropaya, 6 mlrd. kubmetri Türkiyəyə tədarük ediləcək.
TAP layihəsi “Şahdəniz” yatağından təbii qazın Yunanıstan və Albaniyadan Qərbi Avropaya nəqlini nəzərdə tutur. Boru kəmərinin gücü ildə 10 mlrd. kubmetr qaz təşkil edir. Gələcəkdə bu rəqəmin 20 mlrd. kubmetrə çatdırılması planlaşdırılır.
Ayrıca,2015-ci ildə dövlət büdcəsinin investitsiya xərcləri hissəsindən və xarici kreditlər hesabına əhalinin enerji təminatının yaxşılaşdırılması üçün 1,1 milyard manat ayrılacaq (1,4 milyard dollar.).
