Oktyabrın 14-də Turkiyədə Ankara JW Marriot otelində “Şah Dəniz-2” sahəsındən çıxarılacaq təbii qazın Türkiyə ərazisi ilə Avropaya nəqlini nəzərdə tutan Trans Anadolu Təbii Qaz Boru Xəttinin Ana Xətt Borular və Modul Dirsəklərinin Alınması Müqavilələri imzalanmışdır.
SOCAR mətbuat xidmətinin yayadığı məlumata görə, imzalanma mərasimində Türkiyənin Baş naziri Əhməd Davudoğlu, energetika və təbii ehtiyatlar naziri Taner Yıldız, ARDNŞ-nin prezidenti Rövnəq Abdullayev və digər rəsmi şəxslər iştirak etmişlər.
Boruların tədarükü üzrə tenderin qalibi ”Mannesmann-Noksel-Erciyas” şirkətlər konsorsiumu, ”Ümran-Emek” şirkətlər konsorsiumu, ”Tosçelik Profil və Sac Endüstrisi” şirkəti, habelə Çinin ”Baosteel Europe” podratçı şirkəti olmuşdur.
İmzalanma mərasimində qeyd olunmuşdur ki, layihədə təxminən 1800 kilometrlik ana xətt borusu üçün açılan tenderin 80%-ni 6 türk şirkət qazanmışdır.
TANAP-da istifadə edilməsi üçün təxminən 1,2 milyon ton polad borunun üçdə birinin təmin edilməsi tenderini ”Borusan Mannesmann”, ”Noksel Çelik” və ”Erciyas Çelik” konsorsiumu qazanmışdır. Polad boruların daşınmasının 24 ayda tamamlanması gözlənilir.
İmzalanma mərasimində Türkiyə baş naziri Əhməd Davudoğlu çıxış edərək bildirmişdir ki, TANAP enerji layihəsi olmaqla yanaşı, sülh proyektidir, eyni zamanda bir sülh xəttidir. Bu gün 90-cı illərdə böhran bölgələri olaraq xatırlanan Balkan və Qafqaz arasında bir sülh körpüsü qurulur.
SOCAR prezidenti Rövnəq Abdullayev mərasimdə çıxış edərək bildirmişdir ki, TANAP layihəsi sayəsində Türkiyə ”Şərq-Qərb enerji dəhlizi” olacaq. Bu layihə 15-20 min vətəndaşa yeni iş imkanları yaradacaq və Türkiyədə boru istehsalı və boru inşaatı sektoru inkişaf edəcək.
Qeyd edək ki, TANAP-ın 2018-ci ildə istismara verilməsi planlaşdırılır.
