“Azəristiliktəchizat” niyə işləmək İSTƏMİR?

Bunu Trend-ə “Azəristiliktəchizat” ASC-nin sədr müavini İlham Mirzəliyev deyib.
Onun sözlərinə görə, müəyyən edilmiş normalara uyğun olaraq, Azərbaycanın dağlıq rayonlarında isitmə mövsümü noyabrın 1-nə, ölkənin digər rayonlarında isə noyabrın 15-nə təsadüf edəcək: “Bütün lazımi hazırlıq işləri görülüb və hazırda balansımızda olan bütün infrastruktur və qazanxanalar mövsümün başlamasına tam hazırdır”.
İstilik mövsümünə nəzərdən tutulmuş müddətdən tez başlama imkanları haqqında danışan ASC sədrinin müavini qeyd edib ki, hava şəraiti nəzərə alınmaqla buna ehtiyac yoxdur: “İstilik mövsümünə nəzərdən tutulmuş müddətdən tez başlamaq üçün havanın temperaturu bir neçə gün ərzində 6-8 dərəcə və ya aşağı olmalıdır. İstilik mövsümünə tez başlama səbəblərindən biri hava şəraitinin kəskin pisləşməsi də ola bilər və bunun üçün qazanxanaların işə salınması üzrə xüsusi hazırlıq qrafiki mövcuddur”.
İ.Mirzəliyevin sözlərinə görə, lakin hazırda havanın temperaturu 14-16 dərəcə isti təşkil edir: “Müvafiq olaraq, isitmə mövsümünə nəzərdən tutulmuş müddətdən tez başlamağa ehtiyac yoxdur. Normalara uyğun olaraq, isitmə mövsümündən sonra binalarda havanın temperaturu 18-20 dərəcə isti, tibb müəssisələrində isə 20-22 dərəcə isti olur. Yaşayış binaları və digər obyektlərin (məktəb, uşaq bağçaları, sosial obyektlər) də payız-qış mövsümünə hazır olması önəm kəsb edir. Bundan başqa, təkcə istiliyin verilməsi deyil, həm də onun itkiyə məruz qalmasının qarşısını almaq vacib amildir”.
Son illər ərzində mərkəzi istilik sisteminin bərpa edilməsi və onun əhatə dairəsinin genişləndirilməsi sahəsində xeyli işlər görülüb. Görülmüş işlər nəticəsində ASC-nin istilik verdiyi binaların sayı 988-dən (2005-ci il) 3500-dək artıb”.
Caspian Barrel son günlərin hava temperaturunu araşdırıb. Belə ki, Bakda havanın temperatutu gündüzlər 10-11 dərəcə olsa da, gecələr 6-7 dərəcəyədək soyuyub. Hidrometroloji proqnozlara gəlincə isə, məsələn noyabrın 4-5 tarixində gecə Bakı və Abşeronda havanın 3-5 dərəcəyədək soyuyacağı təxmin edilir. Gündüzlər isə 8 dərəcə ətrafında olacaq. Belə çıxır ki, “Azəristiliktəchizat” ASC üçün havanın hansı temperaturda olması önəm daşımır, və hətta küçədə oktyabr ayında qarın olması belə onlara istilik sisteminin qoşması üçün əsas vermir. Nədən? Çünki onlar Sovet sistemindən qalmış təlimatlarla işləyirlər və ümumiyyətlə, ASC-nin sədr müavini İlham Mirzəliyevin”biz qışa hazırıq” fikrini səsləndirməsi ilə “hazır deyilik” fikri arasında bir TƏCİLİ GECƏYARISI SOS SİQNALI ilə TƏLİM keşirilərsə, məlum olar ki, heç bir fərq yoxdur. Məh buna görə də bu dövlət qurumu yarandığı gündən indiyə qədər fəaliyyətində nə bir ciddi addım atıb binaların istilik sisteminin yaxşılaşdırması yönümündə, nə də keyfiyyətin yaxşılaşdırılmasında. Çünki bilir ki, işləsə də, işləməsə də dövlət büdcəsindən vəsait gəlir və necə xərclənməsi ilə əlaqədər ictimaiyyətə heç bir məlumat da vermir.
Əgər onun yerində kommersiya təşkilatı olsaydı, onda onun marağı yaranardı ki, ildən ilə abonentlərinin sayını artırsın və daha çox vəsait qazansın. İnsanlar isə onda maraqlı olardılar ki, 2 min manat verib evlərinə KOMBİ-qızdırıcı sistemi çəkdirənə kimi təhlükəsiz, daimi qızdırıcı su sisteminə təminat verən bir xidmətdən yararlanardılar.
Həmin özəl şirkət isə artıq noyabrın 15-i kimi məchul bir tarixlə deyil, hava şəraitindən asılı olaraq sistemin qızdırılmasını həyata keçirtmək iqtidarında olardı. Necə ki, qonşu Rusiyada edirlər bunu və hətta dəhlizləri də qızdırırlar, böyük şəhərlərdə isə isti-soyuq suyun daim olması, FƏSİLLƏRDƏN ASILI OLMADAN, vətəndaşlar üçün 50-ilə yaxındır ki, adi bir şeydir…