Neft Fonduna doğrudanmı $200 mlrd vəsait daxil olacaq?

Proqnozlara əsasən, yaxın illərdə Azərbaycan Respublikası Dövlət Neft Fonduna (ARDNF) 200 milyard dollar vəsait daxil olacaq. Trend-in məlumatına görə, bu barədə şənbə günü jurnalistlərə Fondun icraçı direktoru Şahmar Mövsümov bildirib.
Ancaq Mövsümov dəqiqləşdirməyib ki, yaxın illər dedikdə konkrekt olaraq hansı dövrü nəzərdə tutur. Bundan əlavə Fond rəhbəri jurnalistlərə bir məsələni də aydınlaşdırmayıb ki, bu gəlirlər neftdən, qazdan və ya qaz kondensatından olacaq.
Belə ki, Caspian Barrel-in özünün apardığı araşdırmalara görə, 2015-2024-cü illərdə neftin orta ixrac qiyməti 80 dollar səviyyəsində olarsa, onda “Azəri-Çıraq-Günəşli” layihəsi çərçivəsində Azərbaycanın gəlirləri təqribən 100 milyard dollar çərçivəsində olardı. Yox əgər neftin orta ixrac qiyməti 100 dollar təşkil edərsə, onda bu göstərici 120 milyardan bir qədər artıq olardı. Bu dövrdə Azərbaycanın Şahdəniz layihəsindən ümumi gəliri cəmi bir-neçə milyard təşkil edə bilər. Çünki layihə üzrə capital xərcləri həddən çox olduğundan qarşıdakı ilk onillikdə Azərbaycana çatacaq mənfəət ümumiyyətlə az olacaq.
Bir şeyi xatırlatmaq yerinə düşərdi ki, Neft Fondunun yaranmasından 15 ilə yaxın vaxt ötdüyü bir vaxtda onun hesablarına daxil lan vəsaitin məbləği 110 milyard dollardan az olub.
* ARDNF-nin yaradıldığı 1999-cu ildə fondun aktivləri 271 milyon dollar təşkil edirdi. 2014-cü il iyulun 1-nə olan vəziyyətə görə, ARDNF-nin aktivləri 4,86 faiz artaraq cari ilin əvvəli ilə (35 877,5 milyon dollar) müqayisədə 37 622,4 milyon dollar təşkil edib.