Atom energetikası sahəsi üçün avadanlıqlar istehsal edən Fransanın “Areva” şirkəti Azərbaycanda tədqiqat nüvə reaktorunun qurulmasını təklif edir. Bu barədə Rabitə və Yüksək Texnologiyalar Nazirliyinin məlumatında deyilir.
Sentyabrın 3-də rabitə və yüksək texnologiyalar naziri Əli Abbasovun Fransanın “Areva” şirkətinin ekspertlərindən ibarət nümayəndə heyəti ilə görüşü zamanı əməkdaşlıq perspektivləri müzakirə olunub.
“Azərbaycanda nüvə texnologiyalarının inkişaf etdirilməsi, nüvə energetikası üzrə tədqiqatların aparılması planlarından söz açan nazir Rabitə və Yüksək Texnologiyalar Nazirliyinin tabeliyində yaradılan “Milli Nüvə Tədqiqatları Mərkəzi” QSC-nin gələcək fəaliyyətində nüvə enerjisinin sülh və dinc məqsədlərlə istifadə ediləcəyini, artıq bu sahədə BMT-nin Atom Enerjisi üzrə Beynəlxalq Agentliyi (MAQATE), Avropa Nüvə Tədqiqatları Mərkəzi (CERN) ilə əməkdaşlığa başlandığını nəzərə çatdırıb”, – deyə məlumatda qeyd edilir.
Bundan başqa, Ə.Abbasov Azərbaycanda qurulması planlaşdırılan tədqiqat nüvə reaktorunun regiondakı ölkələrin alimləri tərəfindən də istifadə edilə biləcəyini vurğulayıb.
“Areva” nümayəndə heyətinə rəhbərlik edən “Areva”nın Mərkəzi Asiya və Türkiyə nümayəndəliyinin sədri Abbas Cəlali Cəfəri “Milli Nüvə Tədqiqatları Mərkəzi”nin əməkdaşları üçün müxtəlif istiqamətlər üzrə təlimlərin təşkili, tənzimlənmənin qurulması və s. kimi işlərə başlamanın vacibliyini vurğulayıb.
Görüşdə Azərbaycanda tədqiqat nüvə reaktorunun qurulması ilə bağlı “Areva” şirkətinin təklifləri müzakirə olunub.
Həmçinin tərəflər maraq doğuran digər məsələlər ətrafında fikir mübadiləsi aparıblar, əməkdaşlıq çərçivəsində həyata keçiriləcək işlərin sürətləndirilməsi və fəallığın daha da artırılması qərarına gəliblər”, – deyə məlumatda vurğulanır.
İnterfax-Azərbaycan
