“BP-Azerbaijan” şirkəti 2004-2014-cü illər ərzində Azərbaycanda ətraf mühitin 116 monitorinq tədqiqatını aparıb. Bu barədə “BP-Azerbaijan” şirkətinin Ətraf Mühit Departamentinin baş mütəxəssisi Amrita de Souza cümə axşamı Bakıda “Xəzər Şelfi” konfransında çıxışı zamanı məlumat verib.
Onun sözlərinə görə, 92 ekoloji monitorinq dənizdə, 38-i quruda, 24-ü isə sahilboyu zonada aparılıb.
“Bundan başqa, şirkət “BP”nin Meksika körfəzində idarə etdiyi platformada baş verən hadisəyə bənzər fövqəladə halların qarşısının alınması üzrə iş aparır. Bu yaxınlarda biz Azərbaycanın bütün həssas nöqtələrində, xüsusilə “BP-Azerbaijan”ın reallaşdırdığı layihələr çərçivəsində boru kəmərlərinin keçdiyi yerlərdə ətraf və sosial mühitin qiymətləndirilməsini nəzərdə tutan böyük layihənin həyata keçirilməsini başa çatdırmışıq”, – deyə A.Souza qeyd edib.
Onun sözlərinə görə, bu iş neft dağılmalarının qarşısını almaq məqsədilə həyata keçirilib. Şirkət işlərin nəticələrini Fövqəladə Hallar Nazirliyi və SOCAR-a (Azərbaycan Dövlət Neft Şirkəti, SOCAR) təqdim edib.
A.Souza onu da xatırladıb ki, hazırda “BP-Azerbaijan”ın idarə etdiyi neft platformalarında məşəllərdə hasil edilən səmt qazının ümumi həcminin 2%-i yandırılır.
“Bu, standart normalardan kifayət qədər aşağıdır və təhlükəsizlik məqsədi ilə həyata keçirilir. Bəzən səmt qazının müəyyən həcmini məşəldə yandırmaq onun utilizasiyasından daha təhlükəsizdir”, – deyə A.Souza qeyd edib.
Interfax-Azerbaijan
