Enerji məsələləri üzrə Avropa Komissarı Günter Ettinqer Brüsseldə bildirib ki, Avropa Birliyi enerji mənbələrinin şaxələndirilməsi siyasətini davam etdirəcək.
Onun sözlərinə görə, söhbət Norveç və Xəzər dənizindəki mənbələrdən gedir. “Norveç qısa müddət ərzində Avropaya tədarük edilən qazın həcmini 10 milyard kub metr artıra bilər”, deyə Ettinger mətbuat konfransında deyib.
O bildirib ki, Barents və Arktik hövzədə kəşfiyyat işləri həyata keçrilir. Xəzər regiounu ilə bağlı suala cavab verən Ettinger bildirib ki, “Cənub qaz dəhlizi” Azərbaycan, Gürcüstan və Türkiyədən keçməklə Yunanıstan, Albaniya və İtaliyaya mavi yanacaq çatdıracaq.
Onun sözlərinə görə, gələcəkdə digər perspektiv tədarükçülər ilə danışıqlar aparılacaq. Məsələn, İraqdan qaz gələ bilər və ola bilsin ki, Türkmənistandan Xəzər dənizinin dibi ilə qaz kəməri çəkilsin.
“Biz danışıqları davam etdirəcəyik və ümid edirik ki, zaman ilə “Cənub qaz dəhlizi” ilə 10 milyard kub metrdən çox qaz ala biləcəyik”, – deyə Ettinger arxayınlıqla sözlərinə əlavə edib.
