SOCAR-ın (Azərbaycan Dövlət Neft Şirkəti, ARDNŞ) Heydər Əliyev adına Bakı neft emalı zavodu parallel olaraq üç qurğuda təmir işlərinə başlayıb. Bu barədə SOCAR-ın rəsmi saytında məlumat verilir.
Katalitik riforminq qurğusunda, katalitik krekinqin 100-cü bölməsində və 43 nömrəli tədrici koks qurğusunun birinci axınında həyata keçiriləcək təmirin yerinə yetirilməsi məqsədi ilə texniki-təşkilati, təchizat məsələləri müəyyən edilmiş, qüsurlar cədvəli tərtib olunmuşdur. Təmir işləri zavodun 13 nömrəli təmir-quraşdırma sexi tərəfindən həyata keçirilir.
Bundan başqa, yaxın günlərdə zavodun əsas qurğularından sayılan neftin ilkin emalı üzrə ED-AV-6 qurğusunun əsaslı təmirə saxlanılacağı nəzərdə tutulur.
Qeyd edək ki, bu aparılan işlər nəticəsində zavodun emal imkanları genişləndiriləcək və avtomobl benzini istehsalını artırmaq mümkün olacaq. SOCAR bu zavodda əsaslı təmir işləri ilə bağlı hələ ilin əvvəlində anons etmişdi.
Son illər Heydər Əliyev adına NEZ-da neft emalı 4,5-4,1 mln ton arasında dəyişib.
