Azərbaycan Dövlət Neft Şirkəti Sumqayıt şəhərində Azot gübrəsi – karbamid istehsalı zavodunun tikintisi ilə bağlı layihənin idarəedilməsi və müstəqil təftiş xidmətlərinin satınalınması məqsədi ilə açıq tender elan edib.
SOCAR-ın yaydığı rəsmi məlumata görə, tenderdə müvafiq beynəlxalq iş təcrübəsinə, zəruri maliyyə və texniki imkanlara, təcrübəli işçi heyətinə malik bütün hüquqi şəxslər, yaxud hüquqi şəxs birlikləri iştirak edə bilərlər.
BMT tərəfindən ticarət əlaqələrinin qurulmasına sanksiya qoyulmuş ölkələr, ticarət münasibətlərinin qurulması SOCAR-ın avrobondların buraxılması ilə əlaqədar götürdüyü öhdəliklərə xələl gətirə biləcək ölkələr, Azərbaycan ilə müharibə şəraitində olan və ya onun suverenliyinə təhdid yaradan ölkələr, ölkənin tərəfdaş olduğu beynəlxalq müqavilələr üzrə ticarət münasibətlərinin qurulması məhdudlaşdırılan ölkələrdən olan şəxslərin tenderdə iştirakına yol verilmir və belə ölkələrlə birbaşa bağlılığı olan təkliflərə baxılmır.
Eyni zamanda, SOCAR-ın etibarsız mal göndərənləri (podratçıları) hesab edilən və ya Şirkətə qarşı hər hansı gözlənilən məhkəmə işi və ya arbitraj mübahisəsi olan şəxslər iddiaçı qismində çıxış edə bilməzlər.
Zərflərin açılışı mayın 16-da saat 15:00-da iddiaçıların və ya onların səlahiyyətli nümayəndələrinin iştirakı ilə SOCAR-ın Baş ofisində keçiriləcək.
