Azərbaycan Respublikası Dövlət Neft Fondu (ARDNF) yaxın 5 il ərzində “Şahdəniz-2” layihəsinin işlənməsnə, TANAP və TAP qaz kəmərləri layihələrinin reallaşdırılmasına hər il 2-2,5 milyard dollar sərmayə ayrılmasını nəzərdə tutub.
Bu baqda bu gün jurnalistlərə açıqlamasında ARDNF icraçı direktoru Şahmar Mövsümov bildirib.
Onun sözlərinə görə, bu, “Şahdəniz” layihəsinin səmərəli idarə olunması və qazın Avropaya çatdırılması üçün yeni yaradılacaq QSC-nin formalaşdırılması ilə bağlıdır.
Xatırladaq ki, Azərbaycan Prezidenti İlham Əliyevin fevralın 25-də imzaladığı sərəncama əsasən, “Şahdəniz” qaz-kondensat yatağının ikinci mərhələsinin işlənməsi layihəsinin səmərəli idarə olunması, Cənubi Qafqaz, TANAP və TAP qaz kəmərlərinin tikintisi ilə bağlı qapalı səhmdar cəmiyyətinin yaradılması haqqında sərəncam imzalayıb.
Bu layihələrin səmərəli idarə olunması üçün Dövlət komissiyasının təklifi diqqətə alınaraq 100 milyon dollarlıq nizamnamə kapitalı ilə qapalı səhmdar cəmiyyəti (51 faiz dövlətə və 49 faiz SOCAR-a məxsus) yaradılır.
ARDNF-a dövlətin birbaşa mülkiyyətində olacaq QSC-nin iştirak payının maliyyələşdirilməsini təmin etmək tapşırılıb. Cəmiyyətə iştirak payının maliyyələşdirilməsi üçün veriləcək vəsaitlər qaytarılma şərti ilə uzunmüddətli investisiyalar şəklində təqdim ediləcək.
Bununla bağlı Fondun 2014-cü il büdcəsinə yenidən baxılacaq. Çünki, ARDNF rəhbərinin sözlərinə görə, 2014-cü ildə QSC-nin yaradılmasına Dövlət Neft Fondu 51 milyon dollar ayırmağı planlaşdırır və bununla əlaqədar ARDNF-nin büdcəsinin məxaric hissəsinə yenidən baxılmalıdır.
“Biz bu yatırıma sərmayə kimi baxırıq, çünki bu vəsaitlər fonda qaytarılacaq. Biz yatırdığımız butun vəsaitləri 2023-2024-cü illərə qədər ARDNF-ə tam qaytarılacağına ümid edirik”, – deyə Mövsümov bildirib.
