Agentlik öz mənbələrinə istinadən bildirir ki, artıq şirkət öz qərarını işçilərə çatdırıb. Layihəyə 2 minə yaxın insan cəlb olunmuşdu. Bu qərarı “Apple” şirkətinin Baş Əməliyyat direktoru Jeff Uilyams və “Project Titan” layihəsi üzrə məsul vitse-prezident Kevin Linç dəstəkləyib.
Məlumata görə, elektromobil layihəsi üzrə ixtisara düşmüş bir çox işçi süni intellektin inkişafı şöbəsinə köçürüləcək və generativ süni intellektin yaradılması ilə məşğul olacaq.
“Apple”-ın avtomobil komandasında həmçinin bir neçə yüz texniki mühəndis və dizayner var. Onlar başqa şöbələrə keçə bilərlər. İxtisarlar da olacaq, lakin bunun neçə nəfərə təsir edəcəyi hələ məlum deyil, deyə “Bloomberg”-in mənbəsi bildirib.
Xatırladaq ki, “Apple” 2014-cü ildə elektromobil hazırlamağa qərar vermişdi. Şirkət layihə üzrə işləri bir neçə dəfə təxirə salaraq 2028-ci ilə qədər dördüncü dərəcəli avtopilotlu avtomobili (hazırkı avtopilotlu avtomobillərin əksəriyyəti ikinci dərəcəyə malikdir) istehsalını hədəfləmişdi.
Bu arada “Apple” rəhbərliyini və strategiyasını bir neçə dəfə dəyişdi, lakin bu, elektromobil istehsalı məsələsində həqiqətən də irəliləməyə kömək etmədi. Baxmayaraq ki, layihəyə bir neçə milyard dollar sərmayə qoyulmuşdu.
Bundan əlavə, “Apple” elektrik avtomobilini təxminən 100 min dollara satışa çıxaracağına ümid bəsləyirdi ki, layihə kommersiya baxımından özünü doğrultsun.
Belə görünür ki, qlobal bazarda elektrik avtomobilləri bazarında yaşanan və yaşanacaq ciddi rəqabət Amerikanın ən bahalı şirkətində özünün “Project Titan” layihəsinin hazırda istehsal etdiyi digər məhsullar qədər gəlir gətirə biləcəyinə şübhə yaradıb.
