Neft-qaz sənayesində Azərbaycanın ilk özəl hasilatçı şirkəti olan GL dünyada neft-qaz çıxarma sənayesini təmsil edən Qazma Podratçılarının Beynəlxalq Assosiasiyasının (IADC) “Drilling Caspian 2023” konfrans və sərgisində iştirak edib.
Caspian Barrel şirkətin sosial şəbəkələrdə yaydığı məlumata istinad edərək bildirir ki, neft-qaz sənayesində fəaliyyət göstərən şirkətləri, bu sahənin mütəxəssislərini bir araya gətirən tədbirdə çıxış edən GL-in Baş icraçı direktoru Asif Zeynalov, Quyular və qazma işləri üzrə direktor David Triolo və Sağlamlıq üzrə menecer Səyamək Əminzadə enerji sənayesində cari meyillər və yeni trendlərə toxunublar.
Tanınmış milli və regional şirkətlərin arasında təmsil olunan GL-in Baş icraçı direktor Asif Zeynalov çıxışında istedadların inkişafına yönəlmiş bazarda rəqabətin əsaslarından danışıb, eləcə də diqqəti bunun şirkətlərin inkişaf strategiyasında əhəmiyyəti məsələsinə çəkib.
David Triolo Xəzər hövzəsi üzrə enerji sektorunun rəqabətliliyinə dair panel müzakirələrdə iştirak edib. O, Azərbaycanda GL kimi özəl enerji şirkətinin fəaliyyətə başlamasını sektorun inkişafında əhəmiyyətli proses kimi qiymətləndirib.
Səyamək Əminzadə bu gün də aktuallığını qoruyan COVID-19 pandemiyası dövründə davranış təhlükəsizliyinin rolu barədə informativ təqdimatla çıxış edib.
Qeyd edək ki, “GL LTD” MMC (GL) 2019-cu ildə Azərbaycanda təsis olunmuş özəl neft-qaz şirkətidir. Şirkətin törəmə müəssisəsi olan “GL İnvestment” 2021-ci ilin noyabrından “Kürsəngi” və “Qarabağlı” yataqlarının daxil olduğu blokun reabilitasiyası, kəşfiyyatı, işlənməsi və hasilatı üzrə layihədə operator qismində çıxış edir və “Salyan Oil Limited” əməliyyat şirkətində 50 faiz pay sahibidir.
Bundan əlavə şirkətin digər törəmə müəssisəsi – “GL İnternational” Risk Xidmət Sazişi əsasında 2022-ci ilin iyulundan Abşeron ərazisində yerləşən “Buzovna-Maştağa”, “Qala” və “Zirə” yataqlarının daxil olduğu blokun bərpası və işlənməsini həyata keçirir.
