«Azəri-Çıraq-Günəşli» yataqlar blokunda “deep-gas” layihəsi çərçivəsində qaz hasilatı 2024-cü ildə başlayacaq. Bu barədə Azərbaycan prezidenti İlham Əliyev bəyan edib.
“Biz “Şahdəniz” və digər yataqlardan da əlavə qaz hasilatını gözləyirik. Misal üçün, bu il əgər hər şey plana uyğun gedərsə, “Abşeron” yatağından hasilat başlamalıdır. Gələn il isə, əgər heç bir fors-major halları olmazsa, “Azəri-Çıraq-Günəşli” yataqlar blokundan “deep gas” deyilən dərin qaz hasilatını gözləyirik. 2024-cü ildə hasilata başlamağı planlaşdırırıq”, – Əliyev yanvarın 10-da yerli telekanallara müsahibəsində bildirib.
Prezident əlavə edib ki, Azərbaycan iri karbohidrogen xammalı potensialına malikdir.
“Azərbaycanın təsbit edilmiş qaz ehtiyatları məlumdur, mən onları dəfələrlə səsləndirmişəm – 2,6 trilyon kubmetr. Lakin, mən əminəm ki, onlar daha çox olacaq, çünki neft yataqlarında fəaliyyətimizin təcrübəsi ondan xəbər verir ki, ehtiyatlar qazma, yeni texnologiyaların tətbiqinə görə ilkin qiymətləndirmələrdən daha çoxdur. Azərbaycanın qaz sahəsi isə beynəlxalq bazarlara ən azı 100 il öz ehtiyatlarını tədarük edəcək, yəni texnologiyalar inkişaf etdikcə daha çox hasil etmək üçün imkanlar olacaq. Buna görə 2,6 trilyon kubmetr – potensialımızın minimum təsbit edilmiş səviyyəsidir”, – Əliyev deyib.
Caspian Barrel bildirir ki, indiyə qədər “Azəri-Çıraq-Günəşli” neft yataqları blokundan səmt qazı hasil edilir. Azərbaycan Energetika nazirliyinin məlumatlarına görə, 2022-ci ilin sonuna qədər AÇG-dən 203 milyard kubmetr səmt qazı hasil edilib ki, bunun da 150 milyard kubmerinə qədəri neft quyularında lay təzyiqini saxlamaq üçün yenidən quyulara vurulub.
Hələ 1994-cü ilin 20 sentyabrında AÇG üzrə müqavilə imzalanarkən Azərbaycan xarici şirkətlər üçün müqavilə sahəsindən əlavə daha bir limit tətbiq etmişdi – dənizin dibindən başlayaraq 3500 metr dərinlikdən çox yerləşən laylardan karbohidrogen ehtiyatı çıxarıla bilməz. Məhz həmin dərinlikdən başlayaraq təbii qaz layları yerləşir. Hazırda bp və tərəfdaşları qiymətləndirmə quyusunun qazılmasını həyata keçirməyə hazırlaşırlar ki, orada yerləşən təbii qaz ehtiyatlarını müəyyənləşdirsinlər. Nəticədən asılı olaraq şirkətlər həmin qaz həcmlərinin işlənməsi layihəsini hazırlayaraq sonda Azərbaycan tərəfi ilə yeni bir müqavilə imzalamlıdırlar.
Bundan sonra AÇG-nin dərin qatlarındakı qazın mövcud platformalardan hasil edilməsi və bazarlara çıxarılması həyata keçirilə bilər.
