JOCAP birgə əməliyyat şirkəti “Abşeron” yatağlnda modulların dənizdə quraşdırılmasını başa çatdırıb.
Gələcək “Abşeron” platformasının üç modulu quruda BOS Şelf şirkətinin (SOCAR-ın törəmə şirkəti) istehsalat sahəsində istehsal edilmiş, buradan “Azərbaycan” kran gəmisinin vasitəsi ilə daşıma barjalarına yüklənib.
Trend agentliyinin yaydığı xəbərə görə, 17 sentyabr 2022-ci il tarixində üç modul dənizdə dayaq blokunda müvəffəqiyyətlə quraşdırılmışdır. Onlar buradan “Azneft” İB-nin “Neft Daşları” yatağındakı mövcud qurğularına birləşdiriləcəkdir.
“Quruda modulların istehsalının tamamlanması və onların dənizdə quraşdırılması “Abşeron” layihəsinin işlənməsinin mühüm mərhələləridir,” – deyə JOCAP şirkətinin İcraçı direktoru Lionel Tomas bildirib.
“Bu mərhələnin müvəffəqiyyətlə tamamlanmasında iştirak etmiş bütün heyətə təşəkkürümü bildirmək istərdim. Bu andan etibarən, JOCAP, “Abşeron” yatağından ilk qazın qrafik çərçivəsində təhlükəsiz hasil edilməsi üçün dənizdəki əsas əməliyyatları diqqət mərkəzində saxlayacaqdır”, deyə icraçı direktor bəyan edib.
JOCAP (Joint Operating Company of Absheron Petroleum B.V.) Abşeron dəniz blokunun işlənməsi və həmin blokdan hasilat məqsədi ilə “SOCAR Abşeron” (50%) və “TotalEnergies EP Abşeron B.V.” (50%) şirkətlərinin təsis etdikləri və bərabər sahib olduqları qeyri- kommersiya Birgə Əməliyyat Şirkətidir.
“Abşeron” yatağı Xəzər dənizinin Azərbaycan sektorunda, dənizin 600 metrədək dərinliyində Bakıdan 100 km cənub-şərqdə, Şahdəniz yatağından 25 km şimal-şərqdə və “Neft Daşları” yatağının hasilat və emal qurğularından 33 km cənubda yerləşir.
JOCAP Əməliyyat Şirkətinin operator olduğu “Abşeron İHS” layihəsi SOCAR tərəfindən idarə olunan Neft Daşlarının qurğularına qoşulmuş bir quyudan (ABD-001) ibarətdir.
Bu quyudan ilk qazın çıxarılması 2023-cü ildə gözlənilir.
Caspian Barrel xatırladır ki, “Abşeron” yatağı üzrə SOCAR və Fransanın “Totalenergies” şirkətləri arasında Hasilatın pay Bölgüsü Sazişi 2009-cu ilin fevralında imzalanıb. 2011-ci ildə qazılmış kəşfiyyat quyusu ilə qaz-kondensat yatağı açılıb. 2012-ci ildə aparılan qiymətləndirmənin nəticələrinə görə, yataqda 350 milyard kubmetrdən az olmayan qaz ehtiyatının olduğu təsdiqlənib.
