Azərbaycan 2022-ci ilin I yarısında 150 min 806,8 ton AI-92 markalı avtomobil benzini idxal edib ki, bu da ötən ilin müvafiq dövrünün göstəricisindən 30,2 dəfə çoxdur.
Bu haqda Dövlət Statistika Komitəsinin rüblük hesabatında məlumat verilir.
“İnterfaks-Azərbaycan” agentliyinin yaydığı məlumata görə, AI-92 markalı avtomobil benzininin idxal həcmi dəyər ifadəsində $173 milyon 403,17 min (artım 72,6 dəfə) təşkil edib.
Azərbaycana AI-92 markalı avtomobil benzinin idxalının kəskin artımı
Heydər Əliyev adına Bakı Neft Emalı Zavodunun 2022-ci il aprel ayının 4-dən 50 gün müddətinə planlı təmirə dayandırılması ilə əlaqədar olub.
Hesabata görə, $125 milyon 645,95 min dəyərində 109 min 184,1 ton AI-92 markalı avtomobil benzini (bütün idxalın 72,4%-i) Rusiyadan, qalan həcm Türkmənistandan ($41 milyon 731,96 min dəyərində 36 min 571 ton), Qazaxıstandan ($3 milyon 998,18 min dəyərində 3 min 526,29 ton) və Rumıniyadan ($2 milyon 27,08 min dəyərində 1 min 525,41 ton) idxal edilib.
Hesabatda həmçinin bildirilir ki, Azərbaycan 2022-ci ilin I yarısında 46 min 266,92 ton “Premium Euro-95” markalı avtomobil benzini idxal edib ki, bu da 2021-ci ilin müvafiq dövrünün göstəricisindən 38,6% azdır.
İdxal olunmuş “Premium Euro-95” markalı benzinin dəyəri $45 milyon 256,86 min (azalma 13,3%) təşkil edib.
Rusiyadan $22 milyon 967,81 min dəyərində (azalma 26,7%) 23 min 705,07 ton benzin (azalma 48,3%) idxal edilib. “Premium Euro-95” markalı benzin idxalının 51,2%-i bu ölkənin payına düşüb.
Rumıniyadan $6 milyon 505,55 min dəyərində 7 min 286,18 ton, Bolqarıstandan $11 milyon 306,75 min dəyərində 9 min 917,34 ton, Türkmənistandan $4 milyon 153,73 min dəyərində 4 min 944,58 ton, Belarusdan $323,02 min dəyərində 413,75 ton benzin idxal edilib.
2022-ci ilin yanvar-iyun aylarında Azərbaycana $821,02 min dəyərində (azalma 35,5%) 749,56 ton “Super Euro-98” markalı avtomobil benzini (azalma 52%) idxal edilib.
Rusiyadan $528,4 min dəyərində 482,27 ton, Rumıniyadan $292,62 min dəyərində 267,29 ton benzin idxal edilib.
