Azərbaycan Dövlət Neft Şirkətinin (SOCAR) birinci vitse-prezidenti, prezident vəzifəsini müvəqqəti icra edən Rövşən Nəcəf şirkətə işə qəbul olunan Bakı Ali Neft Məktəbinin (BANM) 31 məzunu ilə görüşüb.
Caspian Barrel SOCAR-ın İctimaiyyətlə Əlaqələr Xidmətinə istinadən bildirir ki, bu ilin mayın 24-26-da BANM-ın məzunlarının işə qəbuluna start verilib.
Qəbul prosesi mərhələli şəkildə və müxtəlif müsahibələrlə həyata keçirilib. Nəticədə, müsahibəni uğurla keçən məzunlar SOCAR-ın müxtəlif müəssisələrindən iş təklifi alıblar. Beləliklə, bakalavr pilləsi üzrə 102 məzundan, 31-i işlə təmin olunub.
“SOCAR-ın 2035-ci ilə qədər Korporativ Strategiyası” çərçivəsində müəyyənləşdirdiyi enerji keçidi, rəqəmsallaşma və innovasiya kimi strateji hədəflərindən bəhs edən R.Nəcəf, yeni işə qəbul olunan məzunların potensialının, bilik və bacarıqlarının şirkətin daha parlaq gələcəyinin təmin edilməsində mühüm rol oynayacağını bildirib.
O, gələcəkdə işə qəbul prosesi ilə bağlı SOCAR-ın həyata keçirdiyi bu kimi layihələrə sahə üzrə digər ali təhsil müəssisələrinin məzunlarının da cəlb olunması məsələsinin diqqət mərkəzində olduğunu qeyd edib, neft-qaz sənayesi üzrə ixtisaslaşmış ən böyük şirkətlərdən biri olan SOCAR-ın Azərbaycanın təşəbbüsü ilə icra olunan qlobal əhəmiyyətli layihələrdə ölkəmizi uğurla təmsil etdiyini diqqətə çatdırıb.
Sonda yeni işə qəbul olunan məzunlarla öz tövsiyələrini bölüşən R. Nəcəf onlara fəaliyyətlərində uğurlar arzu edib.
