Yaponiyanın “TEPSCO” şirkəti 2022-ci ilin birinci yarısında işğaldan azad edilmiş ərazilərdə Qarabağ və Şərqi Zəngəzurda “yaşıl enerji” zonasının yaradılması ilə əlaqədar baş plan hazırlayacaq.
“TEPSCO” artıq işğaldan azad edilmiş ərazilərdə “yaşıl enerji” zonasının yaradılması ilə əlaqədar konsepsiyanı hazırlayaraq Azərbaycan hökumətinə təqdim edib. Konsepsiya çərçivəsində əhalinin məskunlaşmasından asılı olaraq enerjiyə tələbat və enerji təchizatı ssenariləri qiymətləndirilib. Bundan başqa, həmin rayonların enerji potensialı nəzərə alınmaqla müxtəlif “yaşıl” texnologiyaların tətbiqi ilə əlaqədar tədqiqatlar aparılıb. 2022-ci ilin birinci yarısında konsepsiya çərçivəsində, özündə təkif edilən ssenari üzrə ətraflı təhlil və təklifləri ehtiva edən baş planın hazırlanması planlaşdırılır”, – “İnterfaks-Azərbaycan”a Energetika Nazirliyindən məlumat verilib.
İlkin qiymətlədirmələrə görə, işğadan azad edilmiş ərazilərin günəş enerjisi potensialı 7,2 min MVt, külək enerjisi potensialı – 2 min MVt gücündə qiymətləndirilir.
“Azad edilmiş ərazilərdə, dislokasiya rayonları daxil olmaqla, kiçik SES-lərin quraçdırılması məqsədilə Qubadlı, Laçın və Kəlbəcər rayonlarına çoxsaylı ekspedisiyaların nəticələri üzrə 156 MVt ümumi gücündə 41 SES daxil olmaqla, 241,3 MVt ümumi gücündə 45 stansiya müəyyən edilib. O cümlədən, müəyyən olunub ki, bu ərazilərdən erməni işğalçıları qaçdığı zaman 34 stansiya sıradan çıxarılıb”, – Energetika Nazirliyindən qeyd olunub.
Xəbər verildiyi kimi, 2021-ci ilin may ayında Energetika Nazirliyi və “TEPSCO” şirkəti arasında işğaldan azad edilmiş ərazilərdə külək, günəş, hidro, geotermal və bioenerji kimi bərpa olunan enerji potensialından səmərəli istifadə, enerji səmərəliliyi texnologiyaları, müasir enerji idarəetmə yanaşmaları əsasında regionun enerji təminatını həyata keçirmək məqsədilə “yaşıl enerji” zonasının yaradılması ilə əlaqədar müvafiq konsepsiyanın və baş planın hazırlanmasını nəzərdə tutan müqavilə imzalanıb.
3 may 2021-ci il tarixində Azərbaycan prezidenti İlham Əliyev Azərbaycan Respublikasının işğaldan azad edilmiş ərazilərində “yaşıl enerji” zonasının yaradılması ilə bağlı tədbirlər haqqında Sərəncam imzalayıb.
