Azərbaycan Dövlət Neft Şirkətinin (SOCAR) Qara dənizdəki Kulevi neft terminalında ilk bitum tankeri boşaldılıb.
Trend bu barədə terminalın saytına istinadən məlumat verir.
Beləliklə, Kulevi neft terminalı regionda bitum məhsulunun dəniz tankerinə qəbulu və boşaldılması üzrə ilk terminal olub.
Qeyd edək ki, Kulevi terminalında bitum məhsullarının qəbulu və boşaldılması ilə bağlı tikinti işləri may ayında başlamışdı.
Caspian Barrel xatırladır ki, Kulevi terminalı 2008-ci ilin mayında istifadəyə verilib. Onun buraxıcılıq gücü ildə 10 mln ton neft və neft məhsulu olsa da, praktikada bunun təqribən 1/5 qədər maye yüklər nəql edilib.
1 iyul 2020-ci il tarixinə qədər Kulevi terminalı vasitəsilə dörd milyon tondan çox xam neft və 22,8 milyon tondan çox neft məhsulu nəql edilib.
Terminal xam neft, mazut, dizel yanacağı, qazyolu, metanol, reaktiv yanacaq, propilen, maye piroliz qatranı, nafta, izopropil spirti, dizel yanacağı, sənaye yağı, kondensat göndərmək üçün istifadə olunur.
