“Azəristiliktəchizat” QSC 2020-ci ildə istilik enerjisinin satışından 13 milyon 337,6 min manat gəlir əldə edib ki, bu da 2019-cu ilin göstəricisindən 9,3% azdır. Bu barədə “İnterfaks-Azərbaycan” agentliyinə hökumətdən məlumat verilib.
Ötən il cəmiyyətin gəlirlərinin ümumi həcmində 6 milyon 745,5 min manat (artım 2,5%) əhaliyə istilik enerjisinin satışından daxilolmaların payına düşüb.
2020-ci ildə cəmiyyətin istismar xərcləri 72 milyon 697,5 min manat (azalma 1,2%), əmək haqqı xərcləri 17 milyon 222 min manat (azalma 11,1%) təşkil edib.
2020-ci ildə istehlakçılara 1 milyon 855,7 min Gkal (artım 4,6%), o cümlədən əhaliyə 1 milyon 357,2 min Gkal (artım 10,6%), kommunal-məişət ehtiyacları üçün 498,5 min Gkal (azalma 9%) istilik enerjisi satılıb.
Ötən il istilik enerjisi itkisi 229,3 min Gkal (artım 11,2%) təşkil edib.
2020-ci ilin sonuna olan vəziyyətə görə, “Azəristiliktəchizat”ın balansında olan qazanxanaların sayı 1167 (2019-cu ilin sonuna olan göstəricidən 1,1% çox) olub. Qazanxanaların ümumi gücü 2 min 683 Gkal/saat təşkil edir. 1150 qazanxana təbii qazla, 17 qazanxana isə maye qazla işləyir.
“Azəristiliktəchizat” ASC 2004-cü ildə yaradılıb və istilik təchizatı sahəsində dövlət inhisarçısıdır.
