2020-ci ilin yanvar-sentyabr aylarında “Azəri-Çıraq-Günəşli” (AÇG) blokundan neft hasilatı 124 istismar quyusundan həyata keçirilib.
“2020-ci ilin yanvar-sentyabr aylarında müqavilə blokunda 10 hasilat quyusu və 2 su injektor quyusu qazılıb. Sentyabr ayının sonuna olan vəziyyətə görə, 124 neft hasilat quyusu, 39 su və 7 qaz injektor quyusu istismarda olub”, – deyə “BP-Azerbaijan”şirkətinin məlumatında bildirilir.
AÇG blokunun işlənməyə başlandığı dövrdən etibarən ümumilikdə 3,8 milyard barel neft hasil edilib.
“Çıraq” yatağından neft hasilatı 1997-ci ilin noyabrından, “Azəri” yatağının mərkəzi hissəsindən 2005-ci il fevralın 13-dən, “Azəri” yatağının qərb hissəsindən 2005-ci il dekabrın 30-dan, “Azəri” yatağının şərq hissəsindən 2006-cı il oktyabrın 31-dən həyata keçirilir. 2008-ci ilin aprel ayının əvvəlindən “Günəşli” yatağının dərinsulu hissəsində, 2014-cü il yanvarın 29-dan isə “Çıraq” yatağının qərb hissəsində neft hasilatına başlanılıb.
Yanvar-sentyabr aylarında AÇG blokundan 132 milyon barel və ya 17,9 milyon tondan çox neft hasil edilib.
2019-cu ilin yanvar-sentyabr ayları ilə müqayisədə AÇG blokunda neft hasilatı 16 milyon barel və ya 2,1 milyon ton azalıb.
“Azəri”, “Çıraq” yataqlarının və “Günəşli” yatağının dərinsulu hissəsinin işlənməsi haqqında müqavilə 1994-cü il sentyabrın 20-də imzalanıb və elə həmin ilin dekabrın 12-də qüvvəyə minib. Müqavilənin müddəti 2024-cü ildə başa çatmalı olsa da, 2017-ci il sentyabrın 14-də Bakıda AÇG blokunun 2050-ci ilədək işlənməsi haqqında yeni müqavilə imzalanıb.
Yeni müqaviləyə əsasən layihənin operatoru olan BP şirkəti (Britaniya) 30,37%, SOCAR 25%, MOL (Macarıstan) 9,57%, “ExxonMobil” (Amerika) 6,79%, ONGC (Hindistan) 2,31%, “Inpex Corp.” (Yaponiya) 9,31%, ITOCHU Oil (Yaponiya) 3,65%, “Equinor” (Norveç) 7,27%, TPAO (Türkiyə) 5,73% paya malikdir.
interfax.az
