“S&P Global Ratings” Beynəlxalq reytinq agentliyi Azərbaycanın emitentin yerli və xarici valyutada uzunmüddətli defolt reytinqini “BB+/B” səviyyəsində təsdiq edib, proqnozu “sabit” saxlayıb. Bu barədə Maliyyə Nazirliyindən məlumat verilir.
“Dünya bazarlarında neft qiymətlərinin kəskin səviyyədə aşağı düşməsi səbəbindən “Standard and Poor’s” agentliyi neft ixrac edən ölkələrin reytinqlərinin növbədənkənar qiymətləndirilməsinə qərar verib. Həmin qiymətləndirmə Azərbaycan Respublikası üçün də aparılıb. Azərbaycanın beynəlxalq kredit reytinqi dəyişməyərək “BB+” səviyyəsində, uzunmüddətli proqnoz isə “sabit” saxladığını təsdiq olunub”, – nazirlik qeyd edir.
Agentliyin qiymətləndirməsinə görə, Azərbaycan əhəmiyyətli valyuta ehtiyatlarına, güclü fiskal mövqeyə (aktivlərə), habelə aşağı xarici borc səviyyəsinə malikdir.
Nazirlik qeyd edir ki, Azərbaycanın krediot reytinqinin qrafikə uyğun qiymətləndirilməsi 2020-ci ilin iyul ayında nəzərdə tutulur.
“S&P”nin qiymətləndirmələrinə görə, bu il Brent markalı neftin qiyməti bir barrel üçün orta hesabla $30, gələn il – bir barrel üçün $50, 2022-ci ildə – bir barrel üçün $55 təşkil edəcək. Agentliyin analitikləri qeyd edirlər ki, cari ilin ikinci rübündə qlobal neft bazarını Səudiyyə Ərəbistanı ilə qiymət müharibəsi və koronavirusun yayılması şəraitində tələbat və təklif arasında ciddi natarazlıq gözlənilir.
“S&P”nin qiymətləndirmələrinə görə, hazırda dünya iqtisadiyyatı COVİD-19 koronavirus pandemiyasının yayılması ilə üzləşir və bu səbəbdən agentlik bu il qlobal resessiya olacağını proqnozlaşdırır.
