Gürcüstanın 2018-ci ildə Rusiyadan təbii qaz alması nəzərdə tutulmayıb. Ölkəmizin “mavi yanacağa” olan tələbatı tam Azərbaycan təbii qazı hesabına ödəniləcək”.
AZƏRTAC xəbər verir ki, bu sözləri jurnalistlərə müsahibəsində Gürcüstanın iqtisadiyyat və davamlı inkişaf nazirinin müavini Qeorqi Çikovani söyləyib.
Nazir müavini Rusiyadan Ermənistana nəql olunan təbii qazın tranzit haqqı müqabilində əlavə qaz alınması ilə bağlı ölkə müxalifətinin fikirlərinin tam əsassız olduğunu bildirib.
Q.Çikovani deyib: “Qazprom” şirkəti ilə imzalanmış müqavilədə qeyd olunub ki, əgər Gürcüstanın pik vaxtlarda və ya qəza zamanı əlavə təbii qaza ehtiyacı olarsa, o zaman həmin həcm Rusiya və ya digər ölkələrdən tədarük oluna bilər. Lakin hazırda buna ehtiyac yoxdur”.
Nazir müavini bildirib ki, hazırda Gürcüstan təbii qazı Azərbaycandan iki istiqamət üzrə – “Şahdəniz” konsorsiumu və “SOCAR” şirkətindən əldə edir.
Onun sözlərinə görə, Gürcüstanın 2018-ci il üçün təbii qaza olan ehtiyacı 2,689 milyard kubmetr həcmində proqnozlaşdırılıb. Bunun da 99,65 faizi Azərbaycandan alınacaq. Yerdə qalan 0,35 faiz yerli hasilatın hesabına ödəniləcək.
Xətayi Əzizov
AZƏRTAC-ın xüsusi müxbiri
Tbilisi
