Azərbaycan hökuməti bu il nəqliyyat sektorunun yaxşılaşdırılmasına 309,2 mln avro və 200 mln dollar dəyərində kredit alır…
Azərbaycan hökuməti 50 ədəd lokomotivin alınması məqsədilə “Societe Generale”, “BNP Paribas” və Fransanın “HSBC Bank”ından 276,995 mln. avro məbləğində kredit cəlb edir. Bu barədə “İnterfaks-Azərbaycan” agentliyinə hökumətdən məlumat verilib.
“Ötən il Azərbaycan hökuməti ilə “Societe Generale”, “BNP Paribas” və “HSBC Bankı”nın Fransa filialı ilə arasında «50 ədəd lokomotivin alınması» layihəsi üzrə 276 mln. 995 min avro dəyərində kredit sazişi imzalanıb”, – deyə hökumətdən qeyd ediblər.
Bundan əlavə Asiya İnkişaf Bankı (AİB) Azərbaycanın dəmir yolu sisteminin inkişafına $200 mln. məbləğində kredit ayırmağı planlaşdırır. Bu barədə “İnterfaks-Azərbaycan” agentliyinə bankın Bakı nümayəndəliyindən məlumat verilib.
“Layihə Direktorlar Şurasında təsdiqlənəcəyi tarixin müəyyən edilməsi məqsədilə sentyabrda bankın rəhbərliyinə təqdim olunacaq”, – deyə məlumatda bildirilir.
Bundan başqa, Azərbaycan hökuməti “Societe Generale” Bankından 151 ədəd «İveco Urban Way» markalı avtobusların alınması məqsədilə 32,205 mln. avro məbləğində kredit cəlb edir. Bu kredit üzrə saziş artıq imzalanıb”, – deyə hökumətdən vurğulanıb.
