Azərbaycanda yeraltı qaz anbarlarında təbii qaz ehtiyatı 2 mlrd. 685,4 mln. kubmetr təşkil edir. Bu barədə “İnterfaks-Azərbaycan” agentliyinə “Azneft” İB-dən məlumat verilib.
“Cari ilin aprel ayından qazın vurulması mövsümünə başlanandan noyabrda qədər yeraltı qaz anbarlarına 1 mlrd. 987 mln. kubmetr qaz vurulub. 2015-ci ildən qalıq qazla birlikdə hazırda anbarlarda yığılmış aktiv qazın miqdarı 2 mlrd. 871 mln. kubmetr təşkil edir. Bu da payız-qış mövsümündə respublikanın təbii qazla təchizatının yüksək göstəricisidir”, – deyə məlumatda qeyd olunur.
Bu il ölkə ərazisində qış mövsümünün daha tez başlaması və respublika əhalisinin qaza olan tələbatının artmasını nəzərə alaraq, oktyabrın 24-dən etibarən Qaz Anbarları İstismarı İdarəsində qazgötürmə mövsümünə daha tez başlanılıb.
“14 noyabr tarixinə olan məlumata əsasən, yeraltı qaz anbarlarından 185,6 mln. kubmetr qaz götürülərək təhvil verilib ki, bunun da 167,8 mln. kubmetri “Qaradağ”, 17,7 mln. kubmetri isə “Qalmaz” qaz anbarlarının payına düşüb. Hazırda anbarlardakı aktiv qazın həcmi 2 mln. 685 mln. kubmetr təşkil edir”, – deyə məlumatda deyilir.
Azərbaycanda iki yeraltı qaz anbarı var – “Qalmaz” və “Qaradağ”. Bakıdan 75 km cənub-şərqdə yerləşən “Qalmaz” yeraltı qaz anbarı 1955-ci ildə, paytaxtdan 25 kilometr cənub-şərqdə yerləşən “Qaradağ” yeraltı qaz anbarı isə 1954-cü ildə istismara verilib.