Azərbaycan hökuməti 2017-ci ildə Bakı-Tbilisi-Ceyhan boru kəməri ilə neft nəqlinin 2016-cı ilin göstəricisi ilə müqayisədə 4,6% – 31 mln. tonadək azalacağını proqnozlaşdırır. Bu barədə “İnterfaks-Azərbaycan” agentliyinə hökumətdən məlumat verilib.
«2016-cı ildə BTC ilə 32,5 mln. ton, 2017-ci ildə 31 mln. ton neft nəql oluncaq», – deyə məlumatda bildirilir.
Proqnozlara əsasən, 2018-ci ildə BTC boru kəməri ilə 30,9 mln. ton, 2019-cu ildə 31,9 mln. ton, 2020-ci ildə 31,1 mln. ton neft nəql olunacaq.
Hazırda BTC neft kəməri ilə “Azəri-Çıraq-Günəşli” yataqlar blokundan hasil edilən neft və “Şahdəniz” yatağından çıxarılan kondensat nəql olunur. Həmçinin 2010-cu ilin iyun ayından başlayaraq BTC kəməri ilə Türkmənistan, 2013-cü ilin oktyabr ayından etibarən Qazaxıstan neftinin nəqli həyata keçirilir.
2015-ci ildə boru kəməri ilə 34,8 mln. ton neft nəql olunub.
BTC neft kəmərinin uzunluğu 1768 km-dir. Bunun 443 km-i Azərbaycan, 248 km-i Gürcüstan, 1077 km-i Türkiyə ərazisindədir.
Layihənin iştirakçıları BP (30.1%); SOCAR (25.00%); “Chevron” (8.90%); “Statoil” (8.71%); TPAO (6.53%); ENI (5.00%); “Itochu” (3.40%); “ConocoPhillips” (2.50%); INPEX (2.50%), “Total” (5.00%) və ONGC (2.36%) şirkətləridir.
