Enerji effektivliyi məsələsi Azərbaycan iqtisadiyyatına təsir edən bilavasitə amil kimi çıxış edir
2016-cı ilin I yarımilliyində “Azərenerji” ASC-nin elektrik stansiyaları 10,8 milyard kilovat\saat elektrik enerjisi istehsal ediblər.
2015-ci ilin analoji dövründə bu rəqəm 11,5 milyard kilovat\saat təşkil edib. Bu haqda “Azərenerji” ASC-nin mətbuat xidməti məlumat yayıb.
Bu ilin iyun ayında ASC-nin elektrik stansiyaları təqribən 1,6 milyard kilovat\saat elektrik enerjisi istehsal ediblər. Ötən ilin eyni dövründə bu göstərici 1,7 milyard kilovat\saat təşkil edib.
Qeyd edim ki, Azərbaycanda elektrik enerjisi hasilatının azalmasına səbəb cari ilin qış mövsümünün ötən illə müqayisədə daha mülayim keçməsidir. Bundan əlavə yayın ilk ayında da hava daha sərin olub (cəmi bir-neçə gün havanın temperaturu +30 dərəcəni ötüb).
Ümumiyyətlə, 6 ayda elektrik enerjisinin 700 milyon kilovat\saat qənaətlə istifadəsinin ölkənin enerji sektoru üçün böyük əhəmiyyəti var. Belə ki, ölkədaxili bazarda isehlak edilən təbii qazın 60%-ə yaxını energetika sektorunun payına düşür. Bu sektorun özündə hasil edilən elektrik enerjisinin ötürülməsi və sonra da paylaşdırılması zamanı böyük texniki itkilər mövcuddur (3 mlrd kilovat\saat). Azərbaycan Dövlət Neft Şirkəti isə bu il Rusiyadan qaz idxalını gündəmə gətirib.
Ona görə də energetika sektorunun iqlimdən asılı olmayan faydalı iş əmsalından Azərbaycan iqtisadiyyatının gələcəyi birbaşa asılıdır. Çünki “Azərenerji” hər kilovat\saat elektrik enerjisinin alınması üçün Avropa standartlarında şərti yanacaq sərfiyyatına nail olsa və eyni zamanda texniki itkiləri iki dəfəyədək azalda bilsə, onda SOCAR-ın daxili bazarın uzunmüddətli stabill qaz təminatı ilə bağlı problemi aradan qalxar və hazırkı planlar çərçivəsində daxilə hesablanmış həcmlər xarici istehlakçılara satılar. Bu isə Milli Neft Şirkətimizin qaz biznesindən əldə edəcəyi gəlirləri ən azı bir-neçə dəfə artırmaq deməkdir. SOCAR-ın gəlirlərinin artımı isə büdcəyə köçürmələrin artımı və bundan vətəndaşlarımızın faydalanmasına açılan yeni-yeni imkanlardır.
İlham Şaban
ekspert
